Erkin áńgime túrinde órbigen basqosýda Jazýshylar odaǵy jergilikti fılıalynyń tóraǵasy Januzaq Aıazbekov Muqaǵalı murasynyń búginde bútin ultqa ortaq rýhanı qazynaǵa aınalǵanyn tarqata áńgimeleı kelip, aqyn shyǵarmashylyǵynyń taqyryptyq aýqymy men ómirsheńdiginiń syryn saraptap taldap ótti.
Salıqaly áńgimeden keıin teatr ártisteri birinen keıin biri ilip áketip jatqa oqyǵan oıly óleń-jyr kerýeni men aqyn sózine jazylǵan syrly ánderge kezek berildi. Kesh barysynda Abylaı Maýdanov, Jandos Júsipbek, Dáýlet Jadyrasyn syndy daryndar da sóz alyp, óz óleńderin oqydy.
Sharany uıymdastyrýshylardyń aıtýynsha, mundaı ádebı basqosýlar aldaǵy ýaqytta da jalǵasyn tabady.
– Muzbalaq aqyn Muqaǵalı Maqataevtyń týǵan kúnine oraı ótip jatqan búgingi rýhanı keshtiń mańyzy erekshe. Negizgi maqsat – qaladaǵy ádebıetke beıimi bar jastardyń basyn qosyp, rýhanı orta qalyptastyrý. Bul qatyp qalǵan resmı túrde emes, osy ortany izdep keletin jastardyń erkin shyǵarmashylyq ortasy bolady degen oıdamyz. Mysaly, búgin kelý kerek, osy ortadan tabylý kerek kisilerdiń bári boldy, kóńilden shyqty. Endi mundaı ádebı keshterdi aı saıyn ótkizemiz dep josparlap otyrmyz. Máselen, kelesi keshti Seıit Kenjeahmet aǵamyzǵa arnasaq, teatrdyń kez kelgen jerinen oryn tabylady. Eń bastysy, jastar janymen tilep, izdep kelip otyratyn, keleli oı, súbeli sóz aıtylatyn ortaǵa aınalsa dep oılaımyz, – dedi teatr basshysy Álimhan Myrzahan.
Qostanaı oblysy
