Osy oraıda Petropavldyń PB krımınaldyq bólimi bastyǵynyń orynbasary kapıtan Jasulan Baldyqovty kásibı qyraǵylyǵy zor polıseı dep ataýǵa bolady. Birde ol Bóketov kóshesindegi óz úıinen shyǵa bergende arqalarynda sómkeleri bar asyǵa basyp bara jatqan eki jigitke kózi túsedi. Qyraǵy polıseı olardyń qoldaryn jıi sermep, qysqa sóılep bara jatqandarynan birden kúdik alady. Osynyń aldynda ǵana Sátbaev kóshesindegi úılerdiń birin tonaǵandardyń syrt kelbetterine de ekeýi uqsaıdy eken. Árıne, eki kósheniń arasy ájeptáýir jer. Biraq qyraǵy polıseı mynalardyń sýyt júrgenin birden boljaıdy.
Ol kúdiktilerdiń sońynan beıqam ańdyp otyryp, ózi jedel topty kúdiktilerdiń bet alǵan baǵytyna dereý jetýge shaqyrady. Al jedel toptyń jigitteri kúdiktilerdiń qarsy aldynan toqtaǵanda artqa bezbek bolǵan ózi olardyń aldynan shyǵa kelip, ustaýǵa járdemdesedi. Polısııanyń komandasyn oryndamaı qarsylyq kórsetken kúdiktiler kúshpen baǵyndyrylǵan. Sóıtip, kásibı qyraǵylyǵy zor polıseıdiń arqasynda eki kúdikti yń-shyńsyz ustaldy, al olardyń sómkesinen urlanǵan altyn, kúmis zattar men iri kólemdegi aqsha shyǵa kelgen.
Keıin anyqtalǵandaı Sátbaev kóshesindegi úıdi tonaǵan naq osylar bolyp shyǵady. Sómkeden shyqqan aıǵaq zattardy ıeleri tap basyp tanyǵan. Kúdiktiler Kókshetaý qalasynan kelgen, buryn birneshe retten sottalǵan «gastroler» qaraqshylar bolyp shyqty. Olar Petropavlǵa taksımen kelip, baqýat turatyn adamdar men olardyń úılerin torıdy eken. Osal tusyn tapqan kezde qymbat zattaryn qoldy qylyp, qaladan zytyp otyrǵan.
Qazir osy fakti Qylmystyq kodekstiń 188-shi – «Urlyq» baby boıynsha Sotqa deıingi tergep-tekserýdiń biryńǵaı tizilimine engizildi. Sonymen birge kúdiktilerdiń polısııa qyzmetkeriniń talabyna birden baǵynbaı, qarsylyq kórsetkenderi úshin sotqa deıingi tergeý bastaldy. Ustalǵandar qamaýǵa alynyp, tergeý júrgizilýde.
PETROPAVL
