«Maýsymdyq aýa raıy boljamy, qaralyp otyrǵan maýsym úshin klımattyq shamalardan (norma) aýytqý (anomalııa) túrinde kórsetilgen ortasha meteorologııalyq parametrlerdiń (aýa temperatýrasy men jaýyn-shashyn mólsheri) sıpattamasyn bildiredi.
2022 jylǵy 15 aqpanda Qazgıdromet kóktemge arnalǵan maýsymdyq boljamnyń pılottyq jobasyn úsh aıǵa bóle otyryp shyǵardy. Budan ári, maýsymdyq boljam jylyna alty ret jasalatyn bolady: jyly jarty jyldyqqa arnalǵan 1 boljam, sýyq jarty jyldyqqa arnalǵan 1 boljam. Olar ózara, Qazaqstan Respýblıkasynyń 14 oblysy boıynsha, qys, kóktem, jaz jáne kúzge arnalǵan, toqsandyq boljammen naqtylanatyn bolady», delingen habarlamada.
Sonymen maýsymdyq boljam:
- 15 aqpan kúni kóktemge (naýryz-mamyr);
- 15 naýryzda jyly kezeńge (sáýir-qazan);
- 15 mamyr kúni jazǵa (maýsym-tamyz);
- 15 tamyzda kúzge (qyrkúıek-qarasha);
- qazannyń 15-i sýyq kezeńge (qarasha-naýryz);
- 15 qarashada bolsa qysqa (jeltoqsan-aqpan).
Kóktemde aýa temperatýrasynyń oń anomalııasy bar kúnder kóbirek bolady dep boljanýda. Máselen, naýryz aıynda aýanyń ortasha temperatýrasy respýblıkanyń basym bóliginde normadan 1-2°S joǵary, Batys Qazaqstan oblysynda, Atyraý oblysynyń soltústik-batysynda normaǵa jýyq bolady dep kútilip otyr.
«Al sáýir aıynda elimizdiń barlyq aýmaǵynda aýa temperatýrasy normadan 1°S joǵary bolmaq. Batys Qazaqstan oblysynda, Shyǵys Qazaqstan oblysynyń basym bóliginde, Almaty oblysynyń ońtústik-shyǵysynda bolsa, norma shamasynda.
Alaıda, kóktemgi aýa raıy qysqy tosynsyılar týdyrýy múmkin. Sebebi ótpeli maýsymda sınoptıkalyq prosester óte turaqsyz. Osylaısha, sýyq aýa massalarynyń aǵyndary kezinde, qarly boran kóbinese soltústik aımaqtarda, al arktıkalyq antısıklondardyń kirýimen ońtústik aımaqtarda aıaz bolýy múmkin.
Mamyr aıynda respýblıkanyń basym bóliginde, aýanyń ortasha aılyq temperatýrasy kóp jyldyq normaǵa jýyq bolady dep kútilýde. Alaıda birqatar oblystarda mamyr kúnderi aýa temperatýrasy klımattyq normadan 1°S tómen bolady dep boljanýda. Ásirese, eldiń soltústik, ortalyq jáne shyǵys óńirlerinde. Bul Sibirdiń aýdandarynan sýyq aýa massalarynyń aǵyp ketýine baılanysty bolady dep boljanýda», dep jazady sınoptıkter.
Naýryz aıynda respýblıkanyń basym bóliginde jaýyn-shashyn mólsheri normaǵa jýyq, al Qazaqstannyń soltústik-batys bóliginde normadan artyq bolady dep boljanýda.
Al sáýirde jaýyn-shashyn mólsheri, respýblıkanyń basym bóliginde, elimizdiń batysynda, qıyr soltústiginde, Shyǵys Qazaqstan jáne Almaty oblystarynyń ońtústik-shyǵys jartysynda, Túrkistan jáne Jambyl oblystarynyń taýly, taý bókterli aýdandarynda normadan az bolmaq.
Mamyr aıynda bolsa, respýblıkanyń basym bóliginde jaýyn-shashyn mólsheri normaǵa jýyq, Qyzylorda, Túrkistan, Qostanaı oblystarynyń basym bóliginde, Qaraǵandy oblysynyń batys jartysynda, Jambyl oblysynyń soltústik-batys jartysynda, Aqtóbe oblysynyń ońtústik-shyǵysynda normadan az bolady dep boljanady.
