«Sary» aımaqtyń sanatynda da saqtyq kerek

Aımaqta sońǵy táýlikte indet juqtyrýdyń seksenge jýyq jaǵdaıy tirkeldi. Oblys elimiz boıynsha altynshy orynda. Jyl basynan beri 18733 adamnan koronavırýs zerthanalyq jolmen anyqtalyp, qyryqqa jýyq adam indetten kóz jumdy. Aqpan aıynda ǵana saqtyq sharalaryn  qoldanbaýdyń kesiri kórine bastady. Qazir adamdardyń eti ólip ketken. Alǵashqy bettegideı betperde taǵý, sanıtarlyq talaptardy buljytpaı saqtaý bosańsı bastady. Salǵyrttyqtyń nátıjesi de kózge kórinip tur. Aqpan aıynda 4167 adam indetke shaldyqty.

«Búgingi tańda oblys aýrýhanalarynda jıyrmaǵa jýyq naýqas óte aýyr halde jatyr. Bir aıta keterligi, indet juqtyrǵandardyń basym kópshiligi alpys jastan asqandar. О́ńirde jasy alpystan asqan júz myńnan astam adam bar. Olardyń 59 prosenti indetke qarsy ekpe alsa, on myńnan astamy revaksınadan ótken. Sóz arasynda revaksınadan ótpegen egde adamdar indet juqtyra qalsa, qaýippen kúresý qıyn bolatyndyǵyn taǵy bir qaıtalap aıtqym keledi. Ashyǵyn aıtqanda, múlde ekpe almaǵan adamdar qaharly koronavırýs bylaı tursyn, omıkronǵa da tóze almaıdy. Al, eger ýaqytynda vaksına alǵan bolsa, qaı shtamy bolsyn jeńil ótedi», deıdi oblystyń bas sanıtarlyq dárigeri Aınagúl Mýsına.

Vaksına alýǵa barlyq jaǵdaı jasalǵan. Oblysta qazir 133 pýnkt turaqty jumys istep tur. Ekpe naýqany bastalǵannan beri vaksınanyń birinshi komponentimen 347 946 adam egilgen. Bul oblys turǵyndarynyń 47,3 prosenti. Vaksına saldyrý boıynsha Egindikól aýdany men Qosshy qalasynyń turǵyndary jospardy 100 prosent oryndap, kósh bastap keledi. Bas sanıtarlyq dárigerdiń aıtýyna qaraǵanda, halyqqa qolaıly bolýy úshin ekpe pýnktteri janynan jyljymaly brıgadalar da uıymdastyrylǵan. Olar júkti áıelder men bala emizetin analardyń, zeınetkerlerdiń, múmkindigi shekteýli jandardyń ótinishi boıynsha  úılerine baryp ekpe egip beredi.

«Búgingi tańda 8805 adam Pfizer vaksınasyn aldy. Bul óte tómen kórsetkish. Qazir biz jasóspirimder arasynda da indettiń etek alyp bara jatqandyǵyn kórip otyrmyz. Jyl basynan beri mektep oqýshylary arasynda indetke dýshar bolý derekteri kóbeıip ketti. Tipti, stýdentterge qaraǵanda, oqýshylardyń arasynda alańdatarlyq jaǵdaı týyndap otyr. Munyń barlyǵy ekpe almaǵannyń kesiri. Balalardyń boıynda indetke qarsy ımmýnıtettiń bolmaýy osyndaı olqylyqqa jol berip otyr», deıdi bas sanıtarlyq dáriger.   

Eger vaksınanyń birinshi komponentin alǵandar 21 kúnnen keıin ekinshisin saldyrmaıtyn bolsa, onda olardyń «Ashyq» qosymshasyndaǵy mártebeleri kók túske ózgeredi. Ázirge sary aımaqtyń sanatynda bolǵanymyzben, qaýiptiń qateri qaperimizde júrgeni jón.