Bilim jáne ǵylym mınıstrliginiń habarlaýynsha, qazaqstandyq úsh aýtsaıder (tómen deńgeıli) joǵary oqý orny sot sheshimimen jumysyn toqtatty. Bul – Ortalyq Azııa ýnıversıteti, Aqtaý gýmanıtarlyq-tehnıkalyq ýnıversıteti jáne «Astana» ýnıversıteti. Sońǵy jyldary aty atalǵan joǵary oqý oryndary mınıstrliktiń tapsyrysy boıynsha «Atameken» UKP júrgizetin bilim berý baǵdarlamalarynyń reıtınginde únemi tómen pozısııadan kórindi. Osy úsh ýnıversıtette bilim berý baǵdarlamalarynyń basym bóligi jumys berýshilerdiń talabyna saı kelgen joq jáne bilim alýshylar arasynda da suranysqa ıe bolmaǵan.
Bilim jáne ǵylym salasyndaǵy sapany qamtamasyz etý komıtetiniń tóraǵasy Gúlzat Kóbenova: «Mysaly, Ortalyq Azııa ýnıversıteti reıtıngke 2019 jyly – 36, 2020 jyly – 37, 2021 jyly 11 bilim berý baǵdarlamasy boıynsha qatysty. Iаǵnı kóptegen baǵdarlama boıynsha túlekterdiń azdyǵyna baılanysty nátıje kórsete almady. Jabylǵan joǵary oqý oryndary sapany jaqsartý baǵytynda jumys istegen joq, bilim berý baǵdarlamalaryna ınvestısııa salmady, praktık-mamandardy qyzmetke tartpady. Taldaý nátıjesine súıensek, bilim berý baǵdarlamalary boıynsha reıtıngi tómen joǵary oqý oryndary qaýipti aımaqqa túsetin ýnıversıtettermen ózara baılanysta bolady. Nátıjesinde, aýtsaıder joǵary oqý oryndary lısenzııasynan aıyrylyp, bilim berý qyzmetin toqtatty», dedi.
Mınıstrliktiń málimdeýinshe, «Astana» ýnıversıteti men Aqtaý gýmanıtarlyq-tehnıkalyq ýnıversıtetinde dál joǵarydaǵydaı jaǵdaı. Bul joǵary oqý oryndarynyń bilim berý baǵdarlamalarynyń 70-75%-y sapasy boıynsha talaptarǵa jáne jumys berýshilerdiń suranysyna saı bolmady.
«Sonymen qatar qazir basqa joǵary oqý oryndaryn tekserý nátıjeleri boıynsha sot prosesteri júrip jatyr. Akademık Á.Qýatbekov atyndaǵy Halyqtar dostyǵy ýnıversıtetinde pedagogıkalyq jáne tehnıkalyq baǵyt boıynsha kadr daıarlaý jumys berýshilerdiń talabyna saı kelmeıdi. Kadr daıarlaý sapasyn jaqsartý – mańyzdy másele. Eger búgin ýnıversıtetter tıisti talapqa saı bolmasa, onda erteń biz bilimi men biliktiligi jumys berýshilerdiń suranysyn qanaǵattandyrmaıtyn mamandardy daıarlaımyz. Biz joǵary oqý oryndaryna olqylyqtardyń ornyn toltyrýǵa ýaqyt beremiz, alaıda olar túzetýge asyqpaıdy. Osyǵan baılanysty biz qatań shara qoldanamyz. Joǵary oqý oryndary oqytý jaǵdaıyn, bilim berý baǵdarlamalaryn, sonymen qatar stýdentterdiń túrli mamandyqty meńgerý daǵdylaryn jaqsartýǵa jaǵdaı jasaýy tıis. Olaı bolmasa, joǵary oqý oryndary dıplomdardy sapaly bilim bermeı-aq úlestiredi», dep tolyqtyrdy Gúlzat Kóbenova.
Sońǵy úsh jylda jumys berýshilerdiń JOO-daǵy bilim berý baǵdarlamalarynyń sapasyn baǵalaýyn taldaý nátıjesi jumys berýshiler arasynda maman daıarlaý sapasyna kóńili tolatynyn kórsetti. Ýnıversıtetterdiń bilim berý baǵdarlamalarynyń 85%-y jumys berýshilermen kelisilgen. Qabyldanǵan túzetýlerge sáıkes, oqý jylynyń basynan bastap praktık-mamandar tartylady.
