Boks • 23 Aqpan, 2022

Shırek fınalda – 10 boksshymyz

581 ret

kórsetildi

3 mın

oqý úshin

Bul kúnderi Bolgarııa astanasy – Sofııada bokstan halyqaralyq «Strandja kýbogy-2022» jarysy ótip jatyr. Bıyl 73-shi márte uıymdastyrylǵan baıraqty dodada Qazaqstan boksshylary eki qurammen óner kórsetýde. Sondaı-aq Eýropa men Azııa qurlyǵynyń eń úzdik quramalary da baq synaýda.

Álı BITО́RE

Jarystyń alǵashqy eki kúniniń qorytyndysy boıynsha Qaırat Sátjanov basshylyǵyndaǵy ulttyq qurama ókilderiniń 10 boksshysy týrnırdiń shırek fınalyna joldama aldy. Atap aıtqanda, eń jeńil salmaqta (48 kg) sharshy alańǵa shyqqan jastar arasyndaǵy álem chempıony Sanjar Táshkenbaı men 2020 jylǵy Qazaqstan birinshiliginiń jeńimpazy Danııal Sabıt, 51 kılodaǵy Damır Ábdiqadyr, Tımýr Qabdeshov, byltyrǵy álem birinshiliginiń kúmis júldegeri Mahmud Sabyrhan (54 kg), Abzal Serik (63,5 kg), Dýlat Bekbaýov (67 kg) Saǵyndyq Toǵambaı

(86 kg), Abzal Quttybekov (92 kg) jáne Nurlan Saparbaı (92 kılodan joǵary) irikteý jarystaryn sátti ótkizdi. Endi olar búgin jáne erteń shırek fınal básekelerine shyǵady.

Irikteý kezeńderinde Abzal Serik serbııalyq Pavel Fedorovtan aılasyn asyrsa, Dýlat Bekbaýov alǵashqy aıqasynda jerlesimiz, jastar arasyndaǵy Azııa chempıony Darhan Dúısebaıdan basym tússe, ekinshi aınalymda fransııalyq Ýgo Graýdy 5:0 esebimen jarys jolynan yǵystyrdy. Dýlat endi shırek fınalda ózbekstandyq Jahongır Rahmonovpen judyryqtasady.

Sondaı-aq 86 kıloda óner kórsetetin Saǵyndyq Toǵambaı qyrǵyzstandyq Erkın Adylbek ýýlýyn – 5:0 (30:27, 30:27, 29:28, 30:27, 30:27), 92 kılodaǵy Abzal Kuttybekov reseılik Vladımır Ýzýnıandy – 4:1 (30:27, 28:29, 29:28, 29:28, 29:28) jáne 92 kılodan joǵary salmaqtaǵy Nurlan Saparbaı da ıtalııalyq Vınchenso Fıaschettıdi 5:0 (30:27, 30:26, 30:27, 30:26, 30:27) esebimen esh qıyndyqsyz jeńdi.

О́kinishke qaraı, Talǵat Syrymbetov (54 kg), Darhan Dúısebaı (67 kg), Dıas Moljigitov (75 kg), Jánibek Qartbaev (80 kg) jáne Amanat Sabyrǵalı (92 kılodan joǵary) alǵashqy aınalymda-aq qarsylastarynan jeńilip, jarys jolynan shyǵyp qaldy.

Aıta keteıik, 27 aqpanǵa deıin jalǵasatyn Strandja 2022 jarysyna álemniń 36 elinen kelgen 300-den asa (206 er, 139 áıel) bylǵary qolǵap sheberi qatysyp jatyr. Erler 13 salmaq dárejesinde, al qyzdar 12 salmaqta óner kórsetýde. Bıylǵy týrnırdiń jalpy júlde qory 200 myń AQSh dollaryn quraıdy. Halyqaralyq boks federasııasy (IBA) Sofııada úzdik shyqqan sańlaqtardy alǵash ret qarjylaı syılyqpen marapattamaq. Máselen, bıylǵy «Strandja kýbogynyń» jeńimpazy – 4 myń, kúmis júldeger 2 myń dollar jáne qolaǵa qol jetkizgender 1 myń AQSh dollaryn syıaqy retinde alady.