Floıd 1977 jyldyń 24 aqpanynda AQSh-tyń Mıchıgan shtatyndaǵy Grand-Rapıds qalasynda dúnıege keldi. Onyń ákesi de kezinde myqty boksshy bolǵan. Úlken Meıvezer ótken ǵasyrdyń 70-jyldarynyń aıaǵynda dańqy jer jarǵan Reı «Shýgar» Leonardtyń ózimen judyryqtasqan. Onyń aǵalary men týǵan-týystarynyń arasynda da tanymal bylǵary qolǵap sheberleri az bolǵan joq. Bir sózben aıtsaq, áýletteri túgel boksshylar. Solarǵa eliktegen Floıd ta osy sport túrine myqtap den qoıdy. Áýeli ol áýesqoılar arasynda tanyldy.
1996 jyly Atlantada alaýy tutanǵan Olımpııa oıyndarynda qola medaldy ıelendi. Bastapqy básekede 19 jastaǵy daryn ıesiniń bizdiń Baqtııar Tilegenovti jeńgeni esimizde. Odan keıin armenııalyq Artýr Gevorkıan men kýbalyq Lorenso Aragonnan aılasyn asyrdy. Biraq jartylaı fınalda joldy bolmady. Amerıkalyq óren Bolgarııanyń ataqty boksshysy, úsh dúrkin álem jáne úsh dúrkin Eýropa chempıony Serafım Todorovtan bir ǵana upaı aıyrmashylyǵymen jeńilip, Olımpıada chempıony atansam degen asqaq armanymen qosh aıtysty. Áýesqoılar arasynda barlyǵy 90 kezdesý ótkizgen Floıd sonyń 84-inde jeńis toıyn toılady.
1996 jyldyń 11 qazanynda Floıd Meıvezer kásipqoı rıngtegi tusaýkeser kezdesýin ótkizip, meksıkalyq Roberto Apodakany ekinshi raýndta uryp jyqty. Al onyń sodan keıingi júrip ótken joly barsha jankúıerdiń kóz aldynda. Shırek ǵasyr aralyǵynda ol Dıego Korrales, Hesýs Chaves, Lýıs Kastılo, Demarkýs Korlı, Artýro Gattı, Sharmba Mıtchell, Zab Djýda, Karlos Manýel Baldomır, Oskar de la Hoıa, Rıkkı Hatton, Hýan Manýel Markes, Sheın Moslı, Vıktor Ortıs, Mıgel Kotto, Robert Gerrero, Saýl Alvares, Markos Maıdana, Mennı Pakıao jáne Andre Berto syndy attary ańyzǵa aınalǵan sańlaqtardy san soqtyrdy. Osylaısha, ol eshkimnen jeńilmegen kúıi bylǵary qolǵabyn shegege ildi.
Meıvezerge kóptegen rekord tıesili. Atap aıtsaq, ol bes salmaq dárejesi boıynsha eń beldi nusqalarynyń altyn belbeýin ıelendi. 1998 jyldyń 3 qazanynda alǵash ret álem chempıony atanǵan AQSh boksshysy ózine tıesili tájdi qorǵap qalý úshin 24 qarsylasyn qapy qaldyrdy. Osyndaı tolaǵaı tabysqa qol jetkizgen Floıd biraýyzdan HHI ǵasyrdyń alǵashqy jıyrma jyldyǵynyń teńdessiz boksshysy dep tanyldy. Al keıbir basylymdar ony Muhammed Álı men Maık Taısonnan da joǵary qoıady.
Barsha jankúıer áıgili boksshyny kóbine-kóp Meıvezer emes, Money dep ataıdy. Aǵylshyn tilinen aýdarsaq, bul – aqsha degen sóz. Iаǵnı ol qarjy tabýdyń jolyn jaqsy biledi. 2007 jyly Oskar de la Hoıamen judyryqtasqany úshin Floıdtyń esepshotyna 136,9 mıllıon AQSh dollary aýdaryldy. 2013 jyly Saýl Alvarespen aıqasyp, 150 mıllıonǵa baıydy. 2015 jyly Mennı Pakıaomen kúsh synasqany úshin 437 mıllıon shamasynda oljaǵa keneldi. 2017 jyly erejesiz jekpe-jektiń has sheberi Konor Makgregordy 10-raýndta uryp jyǵyp, 100 mıllıondy «ámııanyna» saldy. Kásipqoı boks tarıhynda Meıvezerge deıin eshkim osyndaı kólemde mol qarajatqa ıelik etip kórmegen.
Sondaı-aq onyń óz bıznesi bar jáne de túrli brendterdi jarnamalap, odan da kóp paıda kóredi. Máselen, ózi qurǵan Mayweather Boxing + Fitness sporttyq dúkender jelisi jylyna 100 mıllıon dollar tabys ákeledi. The Money Team men The Best Ever brendtik kıimderi arqyly 25 mıllıondy ıemdenýde. Las-Vegastaǵy Girl klýbynyń jyldyq tabysy 15 mıllıondy quraıdy. Mine, osylaı jalǵasa beredi.
2018 jylǵa deıin Meıvezer álemdegi eń baı sportshylar tiziminde jeke-dara kósh bastap keldi. Tipti ol ataqty fýtbolshylar men tennısshiler, golf sheberleri men basketbolshylardyń ózderinen asyp tústi. Dáýleti tasyǵan dańqty boksshy óziniń súıikti isinen áldeqashan qol úzgenimen, qarjylyq jaǵdaıy jaqsarmasa, kemigen emes.
