Sýretti túsirgen Erlan OMAR, «EQ»
О́tken apta sońynda oblystyq kommýnıkasııalyq qyzmet ortalyǵynda sanıtarlyq-epıdemııalyq baqylaý departamenti bastyǵynyń orynbasary Iýrıı Sevostıanov baspasóz jıynyn ótkizip, kópshilik kókeıindegi birqatar máseleniń túıinin tarqatyp berdi.
«О́ńirde «omıkron» shtamy bar ma?» degen saýalǵa Iý.Sevostıanov: «Biz naýqastardan alynǵan taldaýlardy respýblıkalyq zerthanalarǵa jibergenbiz. О́kinishke qaraı, olardyń nátıjesin áli ala almaı otyrmyz. Biraq sońǵy kezderi tirkelip jatqan klınıkalyq belgilerge qaraǵanda, óńirde «omıkron» bar dep aıtýǵa bolady», dep jaýap berdi. Departament ókili ekinshi nemese úshinshi ret ekpe qabyldaıtyn 50 jastan asqan oblys turǵyndaryna Pfizer Comirnaty vaksınasy egilýi múmkin ekenin aıtty. Aıtýynsha, bul másele 17 aqpanda ótken salaaralyq komıssııa otyrysynda talqylanypty. «Revaksınasııa qabyldaıtyn múgedektigi bar azamattarǵa da Pfizer Comirnaty vaksınasy egilýi múmkin. Biraq ol úshin elimizdiń bas memlekettik sanıtarlyq dárigeriniń qaýlysy shyǵýy kerek», dedi Iý.Sevostıanov.
Baspasóz jıynynda óńirde «Spýtnık V» jáne «Spýtnık Laıt» vaksınalarynyń tapshy ekeni de aıtyldy.
– Qazir Densaýlyq saqtaý mınıstrligi men ulttyq ortalyq bul vaksınalardy sertıfıkattap jatyr. Sondyqtan bizge ázirshe eki vaksınanyń da keletin kúni belgisiz. Al Qazaqstan azamattary Reseı Federasııasy aýmaǵyna PTR-siz qashan óte alady degen saýalǵa kelsek, buǵan deıin birneshe ret kóterilgen bul másele jaqynda oń sheshim taýyp qalýy múmkin. Bas memlekettik sanıtarlyq dárigerdiń taıaýda qabyldanǵan №9 qaýlysynda Qazaqstannyń vaksına pasportyn moıyndaǵan elderdiń tizimi kórsetilgen. О́kinishke qaraı, Reseı Federasııasy qazirshe bul tizimde joq, – dedi Iý.Sevostıanov.
Qostanaı oblysy
