Jánibek Mýngııamen judyryqtasady

Joǵarydaǵy jańalyqty Jánibektiń komandasy óte jaqsy qabyldady. Olar: «Búgin WBO tujyrymy meksıkalyq dańqty boksshy Mýngııa men Jánibektiń jekpe-jek ótkizýi týraly sheshim shyǵardy. Olar chempıondyq tıtýlǵa talasýǵa tıis. Endi 10 kúnde biraz nárse anyqtalady. Eki tarap kelisimge kelip, meksıkalyq ta Andrade sekildi basqa salmaqqa aýysyp ketpese, biz úshin bul sýper jekpe-jek bolmaq. Sebebi ataǵy jaǵynan Haıme Meksıkada «Kanelodan» keıingi orynda. Ol – boks álemindegi tanymal tulǵa. Jeńilmegen juldyz! Biz daıynbyz! Buıyrtsa, biz bıyl jasyndaı jarqyldap, QAZAQ STYLE-in álemge áıgileımiz!» degen jazba jarııalady ınstagramm-akkaýntyna.

Rasynda da, Álimhanuly úshin bul tamasha múmkindik. Sebebi Haıme nebári 25 jasta bolsa da, sporttyń bul túrinde zor be­del jınap úlgerdi. Ol 17 jasqa tolmaǵan shaǵynda kásip­qoı rıngtegi alǵashqy kezde­sýin ótkizdi. Sol 2013 jyldan beri 39 jekpe-jek ótkizip, bar­ly­ǵynda jeńiske jetti. 31 qarsy­lasyn nokaýtqa jiberdi. Tómen­gi Kalıfornııa shtatyna qarasty Tıhýana qalasynyń týmasy bastapqy básekeleriniń barly­ǵyn tek óz otanynda ǵana ótkizse, sońǵy kezderi AQSh-ta jıi-jıi judyryqtasyp júr. Meksı­kanyń marqasqasy kezinde talaı myqtyny sabady. 2018 jyl­dyń kókteminde Nıý-Iorkte ame­rı­kalyq Sadam Álıdi tórtinshi raýndta esinen tandyryp, WBO nusqasy boıynsha birinshi orta salmaqtyń chempıondyq belbeýin ıelendi. Odan keıin Lıam Smıt, Brendon Kýk, Takesı Inoýe, Den­nıs Hogan, Patrık Allottı, Gar­rı O'Sallıvan, Týreano Djonson, Ka­mıl Sheremeta jáne Gabrıel Rosado sekildi tanymal boksshy­lardy utty. О́ziniń sońǵy kez­desýin ol bıylǵy 19 aqpanda Tı­hýa­nada ótkizip, amerıkalyq Dımıt­rıýs Ballardty ońdyrmaı sabady jáne aıqyn jeńiske qol jetkizdi.

Haıme Mýngııanyń ákesi de kezinde myqty boksshy bolǵan. Asa aýyr salmaqta aıqasqan ol kezinde AQSh chempıony atanyp, basqa da halyqaralyq dodalarda júlde alǵan. Onyń myqty bylǵary qolǵap sheberi bolyp qalyptasýyna ýaqytynda birneshe beldi nusqalar bo­ıynsha álem chempıony atanǵan áıgili Antonıo Margarıtonyń da úlken septigi tıdi. Ekeýi bir zalda jattyǵyp, saqa sportshy jas órenge kóp nárse úıretti.

Bir kezderi dúıim jurt Mýngııany bizdiń Gennadıı Golovkınmen kúsh synasqanyn taǵatsyzdana kútken edi. Dál osy sıpattaǵy áńgimeler 2017-2018 jyldary qatty órbidi. Olar WBC, WBA jáne IBF nus­qalarynyń altyn belbeýi úshin talasýǵa tıis edi. Biraq Nevada shta­tynyń Atletıkalyq komıs­sııasy meksıkalyq órenniń tájirıbesi áli az dep eseptep, ony GGG-ge qarsy shyǵarmady. Son­daı-aq «áne-mine Qanat Islammen judyryqtasady» degen de sybys­tar shyqqan. Biraq Mýngııa bizdiń boksshyny men­sinbedi me álde Qanat odan qaı­myqty ma, ol jaǵy bizge beımá­lim, áıteýir bul báseke ótpeı qaldy.

Áýesqoı rıngte aýyz toltyryp aıtarlyqtaı tabystarǵa qol jetkizgen Jánibek Álimhanuly kásipqoı rıngte de qysqa ǵana merzim aralyǵynda biraz bedel jınap úlgerdi. Judyryqtasý óneriniń jilik maıyn shaqqan maıtalman mamandardan bastap, sarapshylar men bapkerler, jýrnalıster men jankúıerlerge deıin qazaqtyń qaısar ulynyń myqtylyǵyn biraýyzdan mo­ıyndap otyr. Kópshilik ony boks áleminde jarqyraǵan juldyzdardyń biri ári biregeıi sanaıdy. Olaı bolsa, QAZAQ STYLE-in tórtkúl dúnıege tanyt, Jánibek!  Kúlli Alash jurty senen tek jarqyn jeńister kútedi!