Qańtar aıyndaǵy testileýde baq synaǵan 100-den asa qatysýshynyń ishinde negizinen erekshe bilim berýdi qajet etetin 99 adam bar. Byltyr osy kezeńde kórý, estý, tirek-qımyl apparaty buzylǵan 33 talapker test tapsyrǵan bolatyn. Iаǵnı olardyń qatary kóbeıip keledi. Demek, mundaı úmitkerlerge qosymsha ýaqyt berý týraly ózgeris osyǵan baılanysty bolýy múmkin.
Bıylǵy birinshi UBT-nyń nátıjesine kelsek, talapkerlerdiń 70%-ǵa jýyǵy shekti ball jınady. Bul byltyrmen salystyrǵanda 20%-ǵa joǵary. Osyǵan sáıkes ortasha baldyń kórsetkishi de 7%-ǵa artyp, shamamen 68 baldy qurady. Eń joǵary ball 135 boldy.
Ulttyq testileý ortalyǵynyń dırektory Rýslan Emelbaev: «Qysqy UBT bıylǵy 25 qańtar men 22 aqpan aralyǵynda 42 óńirlik testileý ortalyǵynda ótti. Testileý osymen ekinshi jyl qatarynan elektrondy formatta júrgizilip keledi. UBT kezinde talapkerler suraqtarǵa qaıta orala alady jáne qaǵaz blank toltyrýǵa ýaqyt joǵaltpaıdy. Osylaısha, UBT nátıjeleri jaqsaryp, ortasha ball aıtarlyqtaı ósti. Sondaı-aq elektrondy format testileýdiń ashyqtyǵyn qamtamasyz etýge múmkindik berdi. Ornatylǵan kameralar arqyly testileý kezinde ereje buzý faktileri de aıtarlyqtaı azaıdy. Túlekterdiń basym bóligi ózine jáne óz bilimine senetini qýantady», deıdi.
Bilim jáne ǵylym mınıstrliginiń taratqan aqparatyna súıensek, byltyr qańtar aıyndaǵy UBT-men salystyrǵanda bıyl tyıym salynǵan zattardy alyp kirý áreketteriniń sany azaıǵan. Smartfondardy, shpargalkalardy jáne basqa da tyıym salynǵan zattardy alyp ótkisi kelgen 90 talapker test tapsyrý múmkindiginen aıyryldy. Bul – 2021 jylmen salystyrǵanda úsh esege az.
«UBT úsh deńgeıli júıe boıynsha ótkiziledi: Face ID jeke basyn sáıkestendirý arqyly, jeke kýálik boıynsha, sondaı-aq testileý ornynda jeke basyn sáıkestendirý júrgiziledi. Bıyl testileý alǵash ret «bir kompıýter – eki kamera – bir testileýshi» qaǵıdasy boıynsha ótkizildi. Eger buryn testileý barysy ár kompıýterdiń ústinde ornalasqan bir ǵana kameradan baqylansa, endi UBT kezinde jeke tulǵany sáıkestendirýge jáne bógde adamdardyń kirýine jol bermeýge múmkindik beretin ekinshi (aldyńǵy) kamera ornatyldy. Testileý kezinde erejelerdi buzǵany úshin aýdıtorııadan barlyǵy 229 adam shyǵarylyp, olardyń nátıjeleri joıyldy», dep habarlaıdy jaýapty vedomstvo.
Taǵy bir aıta ketetini, bıylǵy birinshi UBT-da túlekterdiń 78,3%-y testileýdi qazaq tilinde, 21,5%-y orys tilinde, 0,16%-y aǵylshyn tilinde tapsyrǵan.
