Osyǵan deıin Qazaqstan boıynsha balabaqshalar men mektepterde 46 ınklıýzııany qoldaý kabınetin ashyp, aýtızm jáne damýynda basqa da erekshelikter bar 600-den asa balanyń mektepke barýyna jaǵdaı jasaǵan «Bolashaq» korporatıvtik qory erekshe balalarmen jumys isteıtin mamandarǵa arnalǵan ádistemelik kitap shyǵardy. Orysshadan aýdarylyp basylǵan bul qural ata-analarǵa, defektolog, logoped, psıholog, pedagogterge usynylǵan. Túpnusqada «Osobye detı. Vvedenıe v prıkladnoı analız povedenııa (AVA): prınsıpy korreksıı problemnogo povedenııa ı strategıı obýchenııa deteı s rasstroıstvamı aýtıstıcheskogo spektra ı drýgımı osobennostıamı razvıtııa» dep atalatyn kitap kezinde minez-qulyqty qoldanbaly taldaýdyń negizgi qaǵıdalaryn egjeı-tegjeıli baıandaıtyn orys tilindegi alǵashqy oqý quraly boldy. Endi qazaqtildi segmentte de alǵashqy ádistemelik oqýlyq bolyp tur. Onda damýynda ereksheligi bar balalardy úıretýdiń bloktar ádisi, tapsyrmalardy qadammen taldaý, tabıǵı ortada úıretý, sheıpıng sekildi basqa da strategııalary sıpattalǵan. Kitaptyń avtorlary Iýlııa Ers jáne Olga Meleshkevıch – sertıfıkattalǵan minez-qulyq taldaýshylary, minez-qulyqty qoldanbaly taldaýdyń keńesshileri, minez-qulyqty qoldanbaly taldaý ádisteri men strategııalaryn qoldaný salasyndaǵy oqytýshylar. Olar AQSh, Izraıl, Reseı, Ýkraına, Grýzııa, Qazaqstan jáne basqa elderdegi minez-qulyq mamandarynyń tájirıbesine jetekshilik etedi.
Kitapty aýdaryp basýǵa «Shevron» kompanııasy demeýshilik kórsetken. «Bolashaq» qory atalǵan kompanııanyń qoldaýymen kitaptyń 3 myń danasyn erekshe balalarmen jumys isteıtin pedagogterge, bilim berý, densaýlyq saqtaý, áleýmettik qorǵaý mamandaryna tegin taratpaq. Sonymen qatar kitap joǵary oqý oryndarynyń arnaıy pedagogıka jáne psıhologııa kafedralaryna, sondaı-aq Qazaqstan Respýblıkasynyń Ulttyq akademııalyq kitaphanalaryna taratylady.
«Bolashaq» qory qamqorshylyq keńesiniń tóraıymy Dınara Gaplan: «Osyndaı kitaptardy aýdarý arqyly qazaq tildi mamandarǵa álemdik ǵylymı qoǵamdastyq moıyndaǵan túzetý pedagogıkasynyń ozyq ádisterine qol jetkizýge múmkindik beremiz. Demek Qazaqstanda erekshe balalarmen jumys isteýdiń tıimdiligin arttyrý úshin anaǵurlym kóp jaǵdaı jasalady. Kitappen jumys kezinde minez-qulyqty qoldanbaly taldaýdyń keıbir tól termınderi aǵylshyn jáne orys tilderinen alǵash ret qazaq tiline aýdaryldy. Osy arqyly ınklıýzııa salasynda qazaqtildi sapaly ádebıettiń negizin qalap otyrmyz. Qor bul baǵyttaǵy jumysyn jalǵastyrady. Qazirgi ýaqytta erekshe qajettilikteri bar balanyń daǵdylaryn baǵalaýǵa arnalǵan ABLLS-R quralyn aǵylshyn tilinen qazaq tiline aýdarýmen aınalysyp jatyrmyz», dedi.
Kitaptyń tusaýkeserinen keıin oqýlyqty qolǵa alyp kórdik. Baıqaǵanymyz, tek teorııamen shektelmeı, praktıkalyq jumystardy kóptep qosqan. Jáne ár bólimde bekitý usynylypty. Mamandarǵa, ata-analarǵa erekshe balalarmen jumysta qoldanylatyn árbir ádis pen tásil jekeleı túsindirilgen. Al sońǵy bólim «Minez-qulyqty qoldanbaly tańdaýdy praktıkada qoldaný» dep atalady, ıaǵnı osy bólimdegi 7 taraý tolyǵymen praktıkalyq jumystarǵa arnalady.
Aýtıst-balanyń anasy ári ózi de arnaıy ortalyqtyń mamany Elmıra Ahmetova atalǵan kitap mamandarǵa jáne ata-analarǵa basty kómekshi bola alatynyn aıtady.
«Men osy oqýlyqtyń oryssha nusqasyn oqyp, is-tájirıbede qoldanǵanmyn. Alǵash balama aýtızm dıagnozyn qoıǵanda, ne ekenin, qalaı jumys isteý keregin, qaıtip damytýǵa bolatynyn bilmedim. Qazaqsha aqparat tym az, kásibı ádistemelik qural múldem joq edi. Sondyqtan oryssha izdep taptym. Ondaǵy ǵylymı-ádistemelik usynymdardy ómirde qoldandym. Balammen 9 jyl boıǵy jumystyń nátıjesinde kóp jetistikke jettik. Ulym qazir sóıleı alady, óz-ózine qyzmet kórsetedi, kıinip, jýynyp, tamaǵyn ózi ishedi, tósegin jınaıdy. Mektepke baryp júr, odan bólek konkı úıirmesine qatysady», deıdi E.Ahmetova.
