Bokstan «kishi álem chempıonaty» atanyp ketken Bolgarııadaǵy týrnırde Qazaqstan erler quramasynan Mahmud Sabyrhan (54 kg) men Saǵyndyq Toǵambaı (86 kg) top jarsa, áıelder básekesinde Nazym Qyzaıbaı (50 kg) men Valentına Halzova (70 kg) altynnan alqa taqty.
Týrnır erejesi boıynsha bıyldan bastap fınaldyq básekeler eki kúnge jalǵasty. Jarystyń birinshi kúngi fınalynda áıelder arasyndaǵy eki dúrkin álem chempıony, byltyrǵy Azııa birinshiliginiń jeńimpazy Nazym Qyzaıbaı bul jolǵy básekede de qarsylas shaq keltirmedi. Fınalda 2019 jylǵy Afrıka oıyndarynyń jeńimpazy, Aljır quramasy sapynda Tokıo Olımpıadasyna qatysqan tuńǵysh áıel boksshy Rýmaısa Býalemmen kezdesti. Úsh raýndqa jalǵasqan jekpe-jekte tóreshilerdiń biraýyz sheshimimen qazaq qyzy jeńimpaz atanyp, Sofııada Ánuranymyz shyrqaldy.
Ekinshi kúngi fınalda Mahmud Sabyrhan, Saǵyndyq Toǵambaı jáne Valentına Halzova syndy tájirıbeli boksshylarymyz baq synap, úsheýi de tuǵyrdyń bıik satysynan kórindi. Byltyrǵy álem birinshiliginiń kúmis júldegeri M.Sabyrhan fınalda 22 jasqa deıingi jastar arasyndaǵy Eýropa chempıonatynda qola júlde alǵan jergilikti boksshy Iаsen Radevpen judyryqtasýy tıis edi. Alaıda qarsylasy jaraqatyna baılanysty rıngke shyqpady. Sóıtip Mahmud el qorjynyna ekinshi altyn júldeni saldy.
Qyzdar arasynda synǵa túsken Valentına Halzova fınalda reseılik Galına Golovchenkoǵa esh múmkindik qaldyrmaı, halyqaralyq týrnırdiń jeńimpazy atandy.
Qazaqstandyq boksshylardyń qatysýymen ótken fınaldyń núktesin Saǵyndyq Toǵambaı qoıdy. 86 kıloda judyryqtasatyn otandasymyz fınalda Ýkraınanyń úsh dúrkin chempıony Sergeı Gorskovpen kezdesip, 5:0 esebimen aıqyn jeńiske jetti.
Al fınalda óner kórsetken taǵy tórt boksshymyz qarsylastaryna ese jiberip, halyqaralyq jarystyń kúmis júldegerleri atandy. Atap aıtqanda, Damır Ábdiqadyr (51 kg), Dýlat Bekbaýov (67 kg), Dına Jolaman (54 kg) jáne Lázzat Kúngeıbaeva (+81 kg) fınalda súrindi. Al Sanjar Táshkenbaı (48 kg), Tımýr Qabdeshov (51 kg), Abzal Serik (63,5 kg), Abzal Quttybekov (92 kg), Nurlan Saparbaı (+92 kg), Rımma Volosenko (60 kg), Darıǵa Shákimova (66 kg), Nadejda Rıabes (75 kg) pen Anastasııa Baıazıtova (81 kg) qola júlde ıelendi.
Sofııadaǵy jarystyń jalpykomandalyq esebinde Qazaqstan quramasy 17 júldemen 3-orynǵa turaqtady. Al 6 altyn jáne 1 qola júldege qol jetkizgen О́zbekstan boksshylary kósh bastady. 5 altyn, 5 kúmis jáne 11 qola júldesi bar Reseı 2-orynǵa taban tirese, jarys qojaıyndary 3 altyn, 4 kúmis jáne 5 qolamen 4-oryndy qanaǵat tutty. Sonymen qatar 2 altyn, 1 qola medal oljalaǵan Úndistan quramasy úzdik bestikti túıindedi.
Aıta keteıik, Halyqaralyq boks federasııasy (IBA) Sofııada úzdik shyqqan sańlaqtardy alǵash ret qarjylaı syılyqpen marapattady. Atap aıtqanda, «Strandja kýbogynyń» jeńimpazyna – 4 myń, kúmis júldegerine – 2 myń jáne qolaǵa qol jetkizgenderge 1 myń AQSh dollary kóleminde syıaqy berdi.
