Eń bir jaǵymdy jańalyq, tehnıkalyq daıyndyq baǵyttary boıynsha úmitkerler úshin shet tilin meńgerýge arnalǵan IELTS testiniń ortasha baly tómendetildi. Endi 5.0 ball jetkilikti jáne bir jyl tildik daıyndyqtan ótý múmkindigi de qarastyrylǵan. Bul sharalar tehnıkalyq mamandyqtar boıynsha oqytý múmkindigin keńeıtýge baǵyttalyp otyr.
«Halyqaralyq baǵdarlamalar ortalyǵy» AQ prezıdenti Ánýar Janǵozın: «Prezıdent Qasym-Jomart Toqaevtyń tapsyrmasy boıynsha baǵdarlamany qaıta baǵdarlaý prosesi bastaldy. Endi ınjenerlik-tehnıkalyq kadrlardy daıyndaý basymdyqqa ıe bolmaq. Sondaı-aq «Injenerlik-tehnıkalyq qyzmetkerler» jeńildetilgen sanatyn engizý qarastyrylyp jatyr. «Bolashaq» baǵdarlamasyna qujat tapsyrý kezinde olar mindetti túrde sheteldik ýnıversıtetterge óz betinshe túspeıdi. Olar aldymen til kýrstarynan ótip, stıpendııa taǵaıyndalǵannan keıin baǵdarlama boıynsha oqýǵa usynylǵan ýnıversıtetter tiziminen oqý ornyn tańdaı alady», dedi.
Ortalyq ókiliniń aıtýynsha, aýyldyq jerlerden kelgen úmitkerlerdiń de múmkindikterin arttyrý josparlanyp jatyr. Mysaly, IELTS nátıjesimen aǵylshyn tilin meńgerý deńgeıin 5.0 balǵa deıin tómendetý, aýyldyq jerlerde mindetti turý merzimi 3 jyldan 2 jylǵa deıin qysqartý josparda bar, olarǵa tildik daıyndyqtan ótýge múmkindik beriledi. Osyǵan qosa aýdandyq mańyzy bar qala turǵyndaryn qosý arqyly aýyldyq jerlerden kandıdattardyń kontıngentin keńeıtý jáne olardyń sanyn ulǵaıtý usynyldy.
«Barlyq prosesti ońaılatý, avtomattandyrý jáne ashyqtyq boıynsha jumys jalǵasady. Akademııalyq adaldyqty qamtamasyz etý úshin stıpendııa berýge konkýrstyq irikteý proktorıng pen antıchıtıngtiń jetildirilgen júıesimen júzege asyrylady. Onlaın format jáne bıznes-prosesterdi odan ári avtomattandyrý irikteý júıesin odan da ashyq, qoljetimdi, yńǵaıly jáne utymdy etedi», dep atap ótti Á.Janǵozın.
