«Tobyl» byltyr Túrkistanda uıymdastyrylǵan tórt klýb («Astana», «Qaırat», «Shahter», «Tobyl») arasyndaǵy Sýperkýbok básekesiniń jartylaı fınalynda sol jylǵy Qazaqstan chempıony «Qaıratty» match sońyndaǵy penaltı serııasynda jeńse, fınalda da elordanyń «Astanasyn» penaltıde qapy qaldyryp, óz tarıhynda alǵash ret Sýperkýbok ıegeri atanǵan edi.
Qostanaıdyń komandasy araǵa jyl salyp byltyrǵy ataǵyn saqtap qana qoımaı, jańa jyldy taǵy bir iri jeńispen bastady. 2021 jylǵy el chempıondary maýsymaralyq úziliste quramyn ájeptáýir kúsheıtti. Atap aıtqanda, ol bıyl «Astananyń» eks-oıynshylary Dmıtrıı Nepogodov (qaqpashy) pen Jarko Tomashevıch (qorǵaýshy), ulttyq quramanyń fýtbolshylary Vladıslav Vasılev pen Aıbar Jaqsylyqov jáne taǵy basqa oıynshylarmen tolyqty. Al «Qaırat» birqatar negizgi quram oıynshylarymen qoshtasyp, jańa maýsymda jastarǵa senim artyp otyr.
«Astana Arenadaǵy» alty myńnan asa jankúıerdiń qoldaýymen ótken Sýperkýbok oıynynda «Tobyldyń» ústemdigi anyq baıqaldy. Eki klýbtyń fýtbolshylary dene qyzdyryp, alańǵa boı úıretkenge deıin kezdesýdiń alǵashqy 10-15 mınýty kórermenderdi azdap jalyqtyrǵandaı boldy. Keıinnen qostanaılyq oıynshylar «Qaırat» qaqpasyna dúrkin-dúrkin qaýipti shabýyl uıymdastyryp, tamasha oıynymen stadıonǵa jınalǵan jankúıerlerdi elitip áketti. Birinshi taımnyń bel ortasynan aýǵanda «Tobyldyń» kezekti shabýylyn «Qaırattyń» qorǵaýshylary óz aıyp alańynda ereje buzý arqyly toqtatty. Nátıjesinde, bas tóreshi penaltı belgiledi. 11 metrlik núktede múlt ketpegen Serikjan Mýjıkov óz komandasyn alǵa shyǵardy. Alaıda oıynnyń 40-mınýtynda «Qaırattyń» brazılııalyq legıoneri Joao Paýlo aıyp alańynyń syrtynan tamasha gol soǵyp, tarazy basyn teńestirdi – 1:1.
Ekinshi taımda oıynǵa VAR aralasty. 64-mınýtta «Tobyl» óz aıyp alańynda oıyn tártibin buzdy. Uzaq talqylaýdan soń bas tóreshi Danııar Sahı VAR kómegine júginip, bul joly qostanaılyq komandanyń qaqpasyna penaltı belgiledi. Biraq «Qaırattyń» portýgalııalyq legıoneri Rıkardo Alvesh dopty qaqpaǵa daryta almady. Sóıtip «sen soqpasań saǵan soǵady» degendeı, matchtyń aıaqtalýyna sanaýly mınýttar qalǵanda alańǵa qosalqy quramnan shyqqan shabýylshy Aıbar Jaqsylyqov mergendigimen kózge túsip, «Tobylǵa» jeńis syılady. Qorytyndy esep – 2:1.
Bul – «Tobyldyń» Qazaqstan Sýperkýbogyndaǵy ekinshi jeńisi. Qostanaılyqtar osy nátıjesiniń arqasynda Almatynyń «Qaıratymen» teńesip aldy. Al osy jarysta úsh márte top jarǵan «Aqtóbe» men bes dúrkin Sýperkýbok ıegeri «Astana» úzdikter kóshin bastap tur.
Sonymen qatar «Tobyl» bul jeńisiniń arqasynda Qazaqstan Sýperkýbogy men 27,5 mln teńge qarjyǵa kenelse, «Qaırat» 12,5 mıllıon teńge tabys tapty.
Osylaısha, Sýperkýbok oıynymen Qazaqstannyń jańa fýtbol maýsymy ashyldy. Erteń elimizdiń birneshe qalasynda fýtboldan kezekti Qazaqstan chempıonatynyń jalaýy kóteriledi. Senbi (5 naýryz) kúni «Kaspıı» – «Qyzyljar», «Turan» – «Taraz», «Atyraý» – «Aqsý», «Astana» – «Shahter», «Ordabasy» – «Maqtaaral» komandalary baq synasa, jeksenbide (6 naýryz) «Qaırat» – «Aqtóbe» jáne «Tobyl» – «Aqjaıyq» klýbtary jasyl alańda jolyǵady.
