Biraq bir yrǵaq, bir ýaqyt, jaqyn-jaqyn ornalasqan jumys oryndary, uqsas baǵyttar álgi qaraqurym halyqty bir-birimen jaılap jaqyndastyra bastaıdy. Tipti keı adamdardy ýaqyt óte kele, odan saıyn tereńdep tanı túsesiń.
Iá, ol jandy men ǵana emes, tutas shahar biletin. Bilse de bilmegendeı bolatyn. Onyń kónetoz qara sur paltosyn, jalbyraǵan shashyn, qolynan tastamaıtyn qyzyl oramalyn, ekinshi qolyndaǵy aýyr sómkesin, ashy daýysyn ol qala eshqashan jadynan óshire almas edi.
Ol tipti shilińgir shildeniń ózinde sol qara sur paltosymen júredi. Aıaǵynda ókshesi áldeqashan opyrylyp qalǵan jyrtyq qara etik. «Men – jeltoqsanshymyn!» deıdi áne bir adamdy toqtatyp! «Sonda kórgen sumdyqtarymdy aıtaıyn ba?» deıdi ekinshisin julqylap...
Biraq ony tyńdaýǵa eshkimniń zaýqy da, qulyǵy da, ýaqyty da joq. Ol óz áleminde áli jeltoqsan kóshelerimen ketip bara jatqandaı bolatyn. Onyń tipti shyjyǵan jazda da qalyń palto kıip júrýi jeltoqsandaǵy aıaz qaryǵan aq tútek, qyzyl qasapty elesteter edi. Ol adam úshin ýaqyt sol 17-shi jeltoqsanda áldeqashan toqtap qalǵan sııaqty. 1986 jylǵy 17-shi jeltoqsanda...
Ol tipti bizdiń otyz jyl buryn Táýelsizdik alyp, egemen el atanǵanymyzdy da bilmeýi múmkin. Ol sol azat merekeni ózi alyp bergeninen de beıhabar bolýy ǵajap emes.
Qoǵam tarıhty teledıdardan berilgen, gazet-jýrnaldarǵa shyqqan, resmı tulǵalar málimdegen aq-qarasy tolyq anyqtalmaǵan aqıqat arqyly ǵana tanı salǵysy kelip turady. Qoǵam qara sur paltoly áıeldi eshqashan tanyǵysy kelmes edi. Sebebi ol bar shyndyqty aıta salýy múmkin. Biz bálkim tolyq aqıqatty bilýge qorqamyz. Kim biledi, múmkin áli de daıyn emespiz. Ol áıeldi sondyqtan da elemeı óte salǵandy jeńil kóremiz.
