Qarııalyq qasıet

Biz Esimseıit atammen kórshi turdyq. Bala kúnimde sol kisiniń qasynan shyqpaı áńgimesin tyńdaý­ǵa qushtar boldym. Áńgimeni júıe­lep, sabaqtap aıtatyn. Aýyl ara­syn­daǵy daý-janjal bola qalsa, ony baıyppen sheship beretin. Tipti ol kisimen sovhoz basshylary da sanasatyn. Bir aqsaqal osylaı ún-túnsiz bir aýyldy aqylymen bas­qaryp otyrdy. Toqsanynshy jyldardyń basynda Esimseıit atam ómirden ozdy. Onyń jolyn Tal­qanbaı atam ustap qaldy. Ol kisi de soǵysqa qatysqan, sa­lı­qaly qart edi. Keıinirek, Tal­qanbaı aqsaqal  dúnıeden ozǵasyn aýyldyń  quty qasha bastady. Jón biletin, sóz us­taıtyndardyń qatary azaıdy. Búginde osy qarııalardyń kózin kórgen Eginbaı ákem ǵana bar. Al  ol ómirden ozsa…

Halqymyz  ejelden jasy úlken qarııany tórge shyǵaryp, erekshe syılaǵan. Kópti kórgen, aıtary mol, sanaly aqsaqaldyń sózin eki etpegen. Eldiń birligin solar saqtap otyrdy. Eshkim de olardyń aldyn kesip ótpedi. Osyndaı ǵasyrlar boıy saqtal­ǵan baı dástúrimiz bar-dy. Onyń barlyq kıesi osy tekti atala­rymyzdyń boıynda boldy.

Búginde aqsaqaldyq jas­qa  ke­she­gi keńestik kezeń tárbıe­si­men ósken aǵalarymyz da kel­di. Árı­ne, olardyń ishinde «aldyńǵy tol­qy­nnyń» asyl qasıetin alyp qalǵan tekti azamattar bar. Biraq olardyń qatary sırek. Osyndaıda ózim kózimmen kórgen atalarymdy saǵynam. Buryn alpystan asqan kisi shal sanalatyn. Ol dastarqannyń tórine shyǵyp, bas ustap, bata beretin. Eski áńgime, shejire shertetin. О́zimiz aýylǵa barǵanda baıqaımyz, alpystaǵy aǵalarmyz shejire shertpek túgil «qarııa» desek, eptep qompańdap qalady.Qazir alpysty qoıyp, jetpiske jetken «kókelerimiz» de qartaıǵysy kelmeıdi. О́tken joly bir toıda jetpistegi aqsaqal jıyr­madaǵy qyzben bılep, jurtty tań qaldyrdy. Aqyry, toıdyń sońynda úlkenimiz degen sol kisiden eki jasqa bata suraǵanda, ony aıta almaı qara terge tústi.

Menińshe, paıǵambar jasyna jetken adamdy qarııa dep aıtýǵa bolady. Qoja Ah­met Iаsaýıdiń ózi: «alpys úsh­ke keldim, endi bylaıǵy ómirim kúpirlik, paıǵambardan aspaq kúná» dep ózine toqtam jasap, ǵumyrynyń aqyrǵy on jylyn jer astyndaǵy qylýette ótkizipti. Danyshpan ba­ba­myzdyń osy sózi de adamdy fılo­sofııalyq oıǵa jeteleıdi.