«Balalardy áýrelegenshe, bazardan satyp almaısyz ba?» deıdi kórshilerimiz. Satyp alýdy bilemiz ǵoı, biraq mynalardyń qarshadaıynan qara jumystyń dámin tatqany jaqsy. Áıtpese, óse kele oqtaý jutqandaı bolyp ılikpeı turady emes pe? Bazarǵa baratyndar bizsiz de jetedi. Qalada turatyn biz túgil, aýyldaǵy aǵaıyn ıin tiresip júr.
Aýylda jer jetedi, kóń degen nesheme jyldan beri úıilip jatyr. Sý eki bastan. Sóıte tura bir tal qııar ekse she?.. Kókónisti aıtasyz, sarymaıdy qaladan satyp alady. Aıtpaqshy, kóń demekshi, bizge de alý kerek eken ǵoı. Kóp emes, jeńil mashınanyń bir qoraby jetip jatyr.
Qala shetindegi saıajaılarǵa kókeıimdi kóń tesip bara qalmaımyn ba, jyldaǵy kórinis sol qalpy eken. Jer telimin jyrtyp beretinder, kóń satatyndar ıin tiresip júr. Bireýiniń janyna at basyn iriktik. Satarman men alarman birin-biri jaǵadan almaq bolyp janyǵyp tur. Baqsaq, kóń qymbattap, baǵa taǵy ózgeripti. Oqyrmanǵa túsinikti bolýy úshin sál taratyp aıta ketelik, oblys ortalyǵynyń irgesinde turatyn aýyldaǵy pysyqtar jylda osy ýaqytta qala turǵyndarynyń saıajaıyna kóń tasıdy. Shamasy, tabysty sharýa bolsa kerek. О́ıtkeni aýyldaǵy kóń tegin, tek artýy men jetkizýi ǵana.
– Byltyrǵy baǵadan bir jarym ese qymbattatypsyńdar, nege?! – deıdi alarman.
– Dollar qymbattap ketti ǵoı, – deıdi satarman.
– Sen sıyrdyń qıyn dollarǵa satyp alyp jatyrsyń ba?! – deıdi alarman alqynyp, – oǵan dollardyń ne qatysy bar?
Ýájden jeńilgen satarmanda ún joq. Shynynda da, «apam toıǵa baradynyń...» keri.
KО́KShETAÝ
