Dálirek aıtqanda, jyl basynan bastap, Eńbekshi aýdany turǵyndary kótergen jalpy 28 ózekti máseleniń búginde 16-y oń sheshimin taýyp otyr.
Bul jóninde búgin aýdan ákimi Dosbol Esilbek qala basshysynyń aýdan belsendilerimen kezekti "ashyq dıalog" formatynda ótken jıynda baıandap, jıynǵa qatysqan aýdan belsendileri tarapynan árbir jumys nátıjeleri rastaldy.
Jıynǵa aýdandyq ardagerler keńesiniń tóraǵasy Zulpyhar Sársenbaıuly, aýdandyq qoǵamdyq baqylaý keńesiniń músheleri jáne aýdan turǵyndary qatysty.
Aýdan boıynsha 28 hattamalyq tapsyrma berilgen. Búginde 16 másele sheshimin tapty. Qalǵany belgilengen kestege sáıkes oryndalý barysynda.
Eltaı turǵyn alaby Toǵys ózenindegi kópirge kúrdeli jóndeý jumystaryn júrgizý boıynsha tıisti mekemelermen tehnıkalyq zerdeleý jumystary qolǵa alynǵan. Kúrdeli jóndeý jumystary úshin aqaý aktisi ázirlenip, ákimdik qaýlysy qabyldanady.
Jumystardy maýsym aıynda aıaqtap, JSQ qujattamasyn ázirleýge qarjy qarastyrý boıynsha bıýdjettik ótinim usynylady.
Búginde Abdýlabad turǵyn alabynda Keńsaı-2 kóshesin ortasha jóndeý jáne aıaq jol salý úshin smetalyq qujattar ázirlendi (0,8 shaqyrym, 35 mln. teńge). Naýryz aıyndaǵy bıýdjettik naqtylaýǵa ótinim berildi.
Qarabastaý turǵyn alabynda «OńtústikJaryqTranzıt» JShS-men búginde 160 turǵyn úı elektr qýatyna qosyldy. Abonentteý jumystary naýryz aıynyń sońyna deıin aıaqtalady.
Jıynda shahar basshysy aýdan ákimderine tapsyrmalardyń oryndalý barysyn paıyzdyq kórsetkishtermen aı saıyn baıandap otyrýdy tapsyrdy.
Aýdan belsendileri sheshimin tapqan máseleler boıynsha rızashylyǵyn bildirdi.
