Aqtaýdaǵy dúken sórelerinen «Aq-Nek» ataýyndaǵy sút ónimderin jıi kezdestirýge bolady. О́timdi taýar tárizdi, sórelerde kóp turaqtamaıdy. «Aqtaýdyń ózindegi zaýyttan óndiriledi eken, bastyǵy Zareta degen áıel adam kórinedi» degen áńgime de «Aq-Nekpen» birge tarap jatady. «Shetelderden kelgen taǵamdardyń quramyna kúdikpen qaraımyz, óz elimizden, onyń ishinde Aqtaýdan shyqqan ónim bolsa, senimdirek eken», deıtinder de joq emes.
Qyzyǵýshylyqpen osy áńgimelerdiń tórkinin tanı túsý úshin atalmysh ónim shyǵarýshy oryndy, onyń basshysyn izdestirdik. Ol «Aq-Nek Mańǵystaý» dep atalatyn jaýapkershiligi shekteýli seriktestigi eken de, basshysy Zareta Fatalıeva eken. 1967 jyly Reseı elinde lezgın otbasynda ómirge kelgen Zareta joǵary bilimdi maman, ári tehnolog, ári zańger. Naryqtyq ekonomıkanyń tabaldyryǵyn attasymyzben óz baǵytyn durys tańdap, boıynda bar uıymdastyrýshylyq qabiletin is basynan tabylýǵa arnaǵan. Sharýasyn shyrq úıirgen isker Zareta qazir tek «Aq-Nek Mańǵystaý» emes, «Aq-Nan Mańǵystaý» nan zaýytyn, «Bereket-F» qoǵamdyq tamaqtandyrý jelisin basqarady. «Aq-Nek Mańǵystaýda» sút, irimshik, aıran, qurt, jemisten daıyndalǵan aıran syndy birneshe sút ónimderin óndirýmen aınalyssa, nan zaýyty qala turǵyndaryn nan ónimderimen migirsiz qamtamasyz etýde. Sút zaýytynan jylyna 450 tonna aq dám, nan zaýytynan 360 tonna ónim tutynýshyǵa jol tartady. Al «Bereket-F»-nyń jóni bólek. 1997 jyly óz qyzmetin bastaǵan JShS qazir biraz tájirıbe jınaqtap úlgerdi. Tamaqtandyrý qyzmetinde, kondıterlik jáne sút ónimderin shyǵarýda «Sáıkestik sertıfıkatyna» ıe seriktestiktiń qyzmetkerleri óz sheberlikterimen kez kelgen áriptesterimen taıtalasa alady, ıaǵnı básekege qabiletti. Sondaı-aq, jumystaryna tolyqtaı otandyq óndiris taýarlaryn, jergilikti eńbek resýrstaryn paıdalanatyndyqtan, otandyq qyzmetterdi usynýshy retinde de maqtaýly.
On jyldan astam ýaqyttan beri Mańǵystaý oblysynyń densaýlyq saqtaý salasy mekemelerin emdik taǵamdarmen qamtamasyz etip keledi. Al bıyl Aqtaý qalasyndaǵy IIM ýchılıshesiniń tyńdaýshylaryn, Mańǵystaý oblysy IID bólimshelerin, «MAEK-Qazatomónerkásip» JShS qyzmetkerlerin ystyq tamaqpen qamtamasyz ete bastaǵandaryna týra on jyl tolypty. Sonymen qatar, 2006 jyldan beri Qazaqstan Respýblıkasy IIM-ge qarasty 6656 áskerı bólimi jeke quramyn, Aqtaýdaǵy Áskerı-teńiz ınstıtýty kýrsanttaryn jáne elimizdiń Qorǵanys mınıstrliginiń Batys aımaq boıynsha áskerı bólimderi jeke quramdaryna ystyq tamaq uıymdastyrý da óz moıyndarynda. Jumystyń jeńili bolmaıdy, óz tutynýshylarymen qoıan-qoltyq jumys jasaı biletin Zareta básekelesi kóp tirlikte tapjylmaǵan bul tabandylyq pen turaqtylyqqa ónimderiniń sapasy arqyly ǵana qol jetkizip keledi. Búgingi tańda 500-ge jýyq adamdy jumys ornymen qamtyp, kásibin shyr aınaldyra júrgizgen Zareta Fatalıeva qaıyrymdylyq sharalarynan tys qalmaıdy. Jetim balalar, mújálsiz otbasylar, múgedek jandar men qaraýsyz qalǵan qart kisiler múmkindiginshe onyń nazarynda. Bıznestiń talaby – toqtap qalmaý. Nan túrlerin daıyndap, sút zaýyty nan-sút ónimderi tolassyz tasymaldanyp, kondıter sehy jumys yrǵaǵynan jańylmaǵan, azyq-túlikti tasymaldap-jetkizýge sanıtarlyq talaptarǵa saı jabdyqtalǵan, sanıtarlyq tólqujattaryn «qaltasyna basqan» arnaıy kólikteri zyrlaǵan, ıaǵnı búgingi tirligine besaspap basshy aldaǵy ýaqytta óndiris kókjıegin keńeıtýdi, qosymsha jumys oryndaryn qurýdy mejelep otyr. Sút jáne kondıter ónimderiniń jańa dúkender qurylysy júrýde. Bolashaqta nan-bólke, makaron ónimderin, shujyq jáne tushpara daıyndaý sehtary ǵımarattaryn, sondaı-aq fermasy men jaıylymdary bar jylyjaı kesheni qurylysyn salý josparda bar.
«Bereket-F» JShS men onyń bas dırektorynyń eńbegi eleýsiz emes. Birneshe baıqaýlarda jeńimpaz bolyp, top jardy. Mańǵystaý oblysy boıynsha «О́ndiris salasyndaǵy jaqsy kásipker» ataýyn eki márte ıelense, «Arzan jáne tátti» nomınasııasynyń, «Otandyq taýarlar jáne qurylys» nomınasııasynyń jeńimpazy atandy.
Otbasynda eki bala tárbıelep otyrǵan úlgili ana, irgeli ujymdy uıymshyldyqpen uıyta basqarǵan basshy, bıznestiń tasyn órge domalatqan kásipker, ulttar dostyǵyna úlesin qosýdy azamattyq paryzym dep biletin Zareta Fatalıeva únemi izdenis ústinde. Bizben telefon arqyly ǵana baılanysa alǵan ol qazir sharýa babymen Reseı elinde issaparda júr. Ony biz Táýelsiz Qazaqstandaǵy el yrysyn eseleýde erlerden kem ter tókpeı, eren úlesin qosyp júrgen qaıratty qyzdardyń biri dep bilemiz. Bul baǵaǵa da ol eńbegi arqyly jetti.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
