QR Parlamenti Senatynyń depýtaty Aqylbek Kúrishbaev «Prıgorodnyı» shaǵyn aýdanynyń turǵyndarymen, sondaı-aq Nur-Sultan qalasyndaǵy páter ıeleri kooperatıvteriniń ókilderimen kezdesti. Senatordyń aıtýynsha, elordada áli de jedel sheshýdi talap etetin birqatar problemalar bar. Ol qala ishindegi saıajaılar on myńnan astam adam turatyn eldi mekenge aınalǵanyn atap ótti.
«Bul saıajaı alaptary elordany damytýdyń bas jospary boıynsha buzylýǵa jatady, tıisinshe, jer telimderin ınvestor nemese memleket naryqtyq baǵamen satyp alýy tıis. Biraq ázirge mundaǵy bar adamdar kútýmen ómir súrip otyr» , - dedi senator.
Aqylbek Kúrishbaev elorda men qalalyq máslıhat depýtattaryn jáne qalalyq kommýnaldyq qyzmet jetekshilerin halyqpen kezdesýge arnaıy shaqyrdy. Mundaı tásil osyndaǵy problemalar týraly aıtýǵa jáne olardy jan-jaqty talqylaýmen qatar sol jerde ákimdik aldynda aıtyp, sheshý jónindegi jospar jasaýǵa múmkindik beredi.
«Munda «asy-sýy mol» oryndardy jekeshelendirip alyp, memleket pen halyq arasynda deldal bolǵan jergilikti olıgarhtar bar. Ákimdik olardy sotqa berip, zańǵa saı kelgen nárseni memleketke qaıtarýǵa tyrysady», dedi ol. Aqylbek Kúrishbaev qosymsha qarjylandyrýdy talap etetin máseleler qalalyq bıýdjet túzetilgennen keıin qaralatynyn atap ótti.
