Mundaǵy mamandar kásipkerlerdiń ótinishi boıynsha bızneske taldaý júrgizip, onyń damý áleýetin anyqtap bere alady. Bıznes ashýǵa nıetti nemese kásibin keńeıtkisi keletin áıelder de osy ortalyqtaǵy túrli trenıngter men semınarlarǵa qatysý arqyly kásipkerlik salasyndaǵy bilimderin jetildiredi.
Ortalyqtyń ashylý saltanatyna oblystyq kásipkerler palatasy óńirlik keńesiniń tóraǵasy Aıdarbek Hodjanazarov qatysyp, oblys ekonomıkasynda ósim bar ekenin, osyǵan oraı áıelder bıznesiniń de áleýeti joǵary ekenin aıtty.
Al Qostanaı oblystyq kásipkerler palatasynyń dırektory Danııar Kúzenbaevtyń paıymynsha, jumysyn jańa bastaǵan ortalyq áıelderge shyǵarmashylyq jáne kásipkerlik múmkindikterin iske asyrýǵa jaǵdaı jasaıdy.
Palata janynan jumys isteıtin isker áıelder keńesiniń tóraıymy Elena Vengerskaıa qazir óńirde aýyl áıelderiniń kóptep kásipkerlikpen aınalysýyna jol ashatyn «Bir aýyl – bir ónim» jobasynyń júzege asyrylyp jatqanyn aıtty.
– Biz oblystyń onshaqty óńirin aralap, jańa kásip ashqysy keletin, biraq isin neden bastaıtynyn bilmeı otyrǵan qyz-kelinshektermen, jalǵyzbasty analarmen kezdesip, áńgimelesip qaıttyq. Aýyldyq eldi mekenderde kókónis ósirgisi keletin, balabaqsha ashqysy keletin, sondaı-aq jergilikti jerde ónim shyǵarǵysy keletin áıelder kóp. Jańa kásiporyn paıda bolsa, jańa jumys oryndary ashylatyny bárimizge belgili. Balamen úıde otyrǵanymen, úı sharýashylyǵynan tys ýaqytta qosymsha tabys taýyp, ol isin súıip isteıtin ermegine aınaldyryp alǵan áıelder de az emes. Olardyń óz isin ári qaraı damytyp, turaqty kásipke aınaldyrǵysy keletinine kózimiz jetip otyr. Alaıda kóp áıelderdiń jańa kásip ashýǵa bastapqy bilimi, erik-jigeri jetpeı qalyp jatady. Olar jańa kásip ashyp, ony ári qaraı damytyp, aıaqtan turyp ketkenshe qoldaý kórsetý kerek. Ol úshin barlyq aýdan ortalyqtarynda osyndaı qoldaý ortalyqtary ashylýǵa tıis. Sonda ǵana shalǵaı óńirlerdegi qarapaıym áıelder kásipkerlikke kóptep bet bura bastaıdy, – dedi E.Vengerskaıa.
Ortalyqtyń ashylý rásimine aýyldan kelgen kásipker áıelder de qatysty. Mysaly, Altynsarın aýdanynan kelgen jeke kásipker Jánııa Jarmuhambetovanyń aýylda sán salony men birneshe dúkeni bar.
– Mundaı ortalyqtyń isin jańa bastap jatqan kásipkerlerge ǵana emes, biz sııaqty saqa kásipkerlerge de kóp kómegi tıedi. Mysaly, meni sońǵy kezderi kásibimdi keńeıtý týraly másele kóp tolǵantyp júr. Ortalyq mamandary taıaýda ǵana bizdiń aýdannyń jergilikti tutynýshylyq áleýeti men meniń jeke bıznesime salystyrmaly taldaý-saraptama jasap, kásibimdi qandaı baǵytta damytýǵa bolatyny týraly kóńilge qonymdy aqyl-keńesterin aıtty, – dedi isker áıel.
Áıelder kásipkerligin damytý ortalyqtary búginde elimizdiń 14 óńirinde jumys istep jatyr.
Qostanaı oblysy
