Taýly jerlerde jaýyn-shashynnyń túsýine jáne qar jamylǵysynyń turaqsyz bolýyna baılanysty Kishi jáne Úlken Almaty sý alabtarynda 25-28 naýyryz aralyǵynda qar kóshkini qaýpi saqtalady.
«Búgin «Shymbulaq» aýmaǵynda qaýipsizdikti qamtamasyz etý úshin «Avalancher» pnevmatıkalyq qondyrǵy arqyly Kishi Almaty ózeni basseıninde kóshkinderdi túsirý boıynsha aldyn alý profılaktıkalyq jumystary júrgizildi. Nátıjesinde 600 tekshe metr qar massasy tastaldy», dep habarlady Almaty qalalyq tótenshe jaǵdaılar departamentiniń baspasóz qyzmeti.
Sonymen qatar, taýly jerlerde qar kóshkini qaýpiniń baryna baılanysty jáne tótenshe jaǵdaılardy boldyrmaý maqsatynda Medeý, Shymbulaq, Tuıyq sý shatqalynda avtokólikter men adamdardyń ótýin shekteý úshin blokpostar qoıyldy.
Sondaı-aq, TJD qala turǵyndary men qonaqtaryn taýǵa barýdan bas tartýǵa, aýa raıynyń jaǵdaıyn baqylaýǵa, qar kóshkinin týdyrýy múmkin tik qarly betkeılerge shyqpaýǵa, tótenshe jaǵdaılardy boldyrmaý maqsatynda barlyq qaýipsizdik sharalaryn saqtaýǵa shaqyrdy.
