2 sáýirde 24 jasqa tolǵaly otyrǵan Taraz fýtbol mektebiniń túlegi eń baǵaly fýtbolshylardyń reıtınginde 10-oryndy ıelengen. Transfermarkt saıtynyń málimetinshe, qazirgi kezde Máskeýdiń SSKA klýbynda óner kórsetip júrgen jerlesimizdiń transferlik quny 4 mln eýrony quraıdy. Esterińizge sala keteıik, Baqtıer Zaınýtdınov óziniń sporttyq mansabyn «Tarazda» bastady. 2018 jyly «Astanaǵa» aýyssa, kelesi maýsymdy Reseı Premer-lıgasyndaǵy «Rostovta» ótkizdi. 2020 jyly ol SSKA-nyń jeıdesin kıdi. Sondaı-aq Zaınýtdınov Qazaqstannyń ulttyq quramasy sapynda 21 ret jasyl alańǵa shyǵyp, 9 goldyń avtory atandy.
Al eń qundy jartylaı qorǵaýshylardyń kóshin Rýslan Malınovskıı bastap tur. Bul kúnderi Italııanyń A serııasynda «Atalantanyń» namysyn qorǵap júrgen 28 jastaǵy Ýkraınanyń Jıtomır qalasynyń týmasy 30 mln eýroǵa baǵalanǵan. Ekinshi orynda – Aleksandr Golovın. 25 jastaǵy reseılik fýtbolshy 2018 jyldan beri Fransııanyń «Monako» klýbynyń namysyn qorǵaýda. Onyń quny – 25 mln eýro. Úshinshi satyǵa Reseıdiń taǵy bir ókili Alekseı Mıranchýk jaıǵasty. 26 jastaǵy «Atalanta» oıynshysynyń baǵasy 11 mln eýro shamasynda.
Sonymen qatar «TOP-10» jartylaı qorǵaýshylar tiziminde Genrıh Mhıtarıan (Armenııa, «Roma», 10 mln), Lýkas Selaraıan (Armenııa, «Kolambýs Krıý», 8 mln), Rıfat Jemaletdınov (Reseı, «Lokomotıv», 7,5 mln), Anton Mıranchýk (Reseı, «Lokomotıv», 7,5 mln), Vıtalıı Býıalskıı (Ýkraına, «Dınamo», Kıev, 7 mln) jáne Ilzat Ahmetov (Reseı, SSKA, Máskeý, 4,5 mln) syndy sańlaqtar bar.
