Osy Jol kartasynyń 22 tarmaǵyna sáıkes agenttiktiń Qyzylorda oblysy boıynsha departamentiniń qyzmetkerleri qoǵam belsendilerimen birlese otyryp memlekettik satyp alý baǵasyn qoldan kótergenderdi anyqtap, sybaılas jemqorlyq táýekelderin anyqtaýǵa múmkindik beretin «Biryńǵaı satyp alý terezesi» veb-portaly arqyly oblys kóleminde jarııalanyp jatqan nemese josparlanyp otyrǵan memlekettik satyp alýlarǵa turaqty túrde monıtorıng júrgizip keledi.
О́tken jyly memlekettik satyp alý josparlaryna júrgizilgen monıtorıng qorytyndysymen 80-nen asa memlekettik mekemege usynys joldanyp, 3,3 mlrd teńge memleket qarjysy únemdelipti. Osy baǵyttaǵy jumystar barysyn baıandaǵan Sybaılas jemqorlyqqa qarsy is-qımyl agenttigi Qyzylorda oblysy boıynsha departamenti basshysynyń birinshi orynbasary Ǵalııa Álimqulova bıyl da memlekettik satyp alýda zań sheginen attap ketkender azaımaı otyrǵanyn jetkizdi.
Mysaly, memlekettik retteý belgilengen bólshek saýdada ótkiziletin munaı ónimderine shekti baǵalar belgileý týraly Energetıka mınıstriniń 2015 jylǵy 19 mamyrdaǵy №361 buıryǵyna engizilgen ózgerister negizinde 1 lıtr dızel janarmaıy 230, AI-92 markaly benzın 182 teńgeden aspaýy qajettigi kórsetilgen. Osyǵan qaramastan oblystaǵy 11 memlekettik mekeme dızel janarmaıynyń 1 lıtrin 280 teńgege deıingi baǵada, al AI-92 markaly benzındi 205 teńgeden satyp alýdy josparlap, munaı ónimderine ketetin shyǵynnyń jalpy somasy 110 865 522 teńgege jetken. Sybaılas jemqorlyqqa qarsy is-qımyl agenttiginiń oblys boıynsha departamenti memlekettik satyp alý lottaryn qaıta qaraý týraly usynym joldap, bıýdjettiń baqandaı 38 243 349 teńgesin únemdeýge qol jetkizdi.
Monıtorıng barysynda Qarmaqshy aýdanyndaǵy №275 orta mektebi memlekettik satyp alý portalynda balalarǵa alynatyn 1 kúrteni 1 670 143 teńgege baǵalap, 125 kúrteni 208 767 875 teńgege satyp alýdy josparlaǵany belgili boldy. Bul kemshilik boıynsha da usynys joldanyp, 1 kúrteniń baǵasy 16 701 teńgege túsirilip, 206 680 197 teńge memleket qarajaty keri qaıtaryldy.
Shıeli aýdandyq bilim bólimi qarmaqshylyq áriptesterinen de asyra siltep jiberipti. Olar 1 lıtr tabıǵı sútti artyq-kemi joq 14 577 000 teńgege baǵalaǵan. Baǵalardy qaıta qaraý kezinde artyq nólder azaıtylyp, baǵa 223 teńgege tústi.
Departamenttegiler osy jyldyń 2 aıynda 17 mekemege joldanǵan usynystardyń nátıjesinde, jalpy somasy 351 230 304 teńgeniń únemdelgenin aıtyp otyr.
Oqıǵaǵa baılanysty áleýmettik jelide pikir aıtýshylar kóbeıe bastaǵan soń oblystyq bilim basqarmasy máseleniń mán-jaıyn túsindirgen jazba jarııalady. Basqarma jaýabynda eki bólim tarapynan da tehnıkalyq qate ketkendigi aıtylady. Sonymen qatar olar kóterińki baǵa boıynsha eshqandaı memlekettik satyp alý júrgizilmegenin eskerte ketipti.
QYZYLORDA
