Osyǵan deıin Investısııalyq daýlardy retteý jónindegi halyqaralyq ortalyqtyń trıbýnaly Big Sky munaı kompanııasynyń Qazaqstan Respýblıkasyna qarsy barlyq talap-aryz talaptary boıynsha bas tartyp, qorǵaýǵa jumsalǵan tórelik shyǵyndar úshin Qazaqstan Respýblıkasyna shamamen 575 myń AQSh dollary kóleminde ótemaqy tóleý týraly sheshim shyǵarǵan bolatyn.
Apellıasııanyń merzimi 2022 jyldyń 24 naýryzynda aıaqtalǵanyn jáne Big Sky osy sheshimniń kúshin joıý týraly ótinish bildirmegenin eskere otyryp, tórelik endi aıaqtaldy dep sanalady.
Tórelik prosess barysynda Big Sky kompanııasy memleketpen baılanysy joq úshinshi tulǵalarmen jeke kelisimsharttardy oryndaýǵa baılanysty 460,1 mıllıon AQSh dollary somasynda eleýli zalaldy Qazaqstan Respýblıkasynan óndirip alýǵa tyrysty. Bul rette Big Sky Qazaqstan Respýblıkasy men AQSh arasynda jasalǵan ınvestısııalyq kelisimniń («Kelisim») erejelerin buzý oryn alǵan boljamdarǵa negizdele otyryp, memleketten zalaldy óndirip alýǵa tyrysty.
Qazaqstan Respýblıkasy trıbýnalǵa Kelisimniń erejelerin buzbaǵanyn jáne barlyq talap qoıý talaptary boıynsha bas tartylýǵa tıis ekenin anyq kórsetti.
Osy iste Qazaqstan Respýblıkasynyń múddelerin Qazaqstan Respýblıkasynyń Ádilet mınıstrligi «Reed Smith LLP» zań fırmasymen birlesip sátti qorǵady.
Bul sheshimge túsinikteme bere otyryp, Ádilet mınıstri Qanat Mýsın:
«Tórelik trıbýnaldyń sheshimi Qazaqstan Respýblıkasynyń negizdelgen ustanymyn tolyq rastaıdy. Qazaqstan Respýblıkasynyń osy jáne basqa da tabystary tórelik talqylaýlarda memlekettiń múddelerin qorǵaý jónindegi tıimdi strategııany qamtamasyz etý boıynsha uzaq jyldar boıy jınaqtalǵan aýqymdy tájirıbeni kýálandyrady. Big Sky áli kúnge deıin Qazaqstan Respýblıkasyna oǵan berilgen, memlekettik bıýdjetke aýdarylýy tıis shyǵystardy tólemegen. Qazaqstan Respýblıkasy shyǵystardyń ótemin berý jónindegi sheshimdi oryndaý jóninde tıisti qadamdar jasaıdy. Ádilet mınıstrligi tıisti quqyqtyq tetikterdi paıdalana otyryp, sheteldik tórelikterde memlekettiń múddelerin bildirý jónindegi jumysty jalǵastyrady», delingen habarlamada.
