Zııaly qaýym ókilderi, ádebıetsúıer qaýym, stýdent jastar qatysqan ádebı kesh aıasynda Amanat partııasy Túrkistan oblystyq fılıalynyń atqarýshy hatshysy B.Tájibaev, oblystyq qoǵamdyq damý basqarmasy basshysynyń orynbasary B.Ahymbetov, oblystyq mádenıet basqarmasy basshysynyń orynbasary A.Temirhan, jazýshy-ǵalym Q.Ergóbek, T.Beısen, B.Serdáli, D.Qýat, Á.Shegebaı, A.Seıdazym, B.Shoıbekov, M.Dáýletov syndy qalamgerler men aqyndar júrekjardy sózderin arnap, syı-syıapattaryn kórsetti. Jazýshynyń shyǵarmalaryn stýdentter mánerlep oqyp, ónerpazdar ánnen shashý shashty. Kesh sońynda jańa týyndy ádebıetsúıer qaýymǵa úlestirilip berildi.
Oqyrmanǵa jol tartqan týyndynyń tusaýkeser rásimi Shymkent qalasyndaǵy Ál-Farabı atyndaǵy ǵylymı-ámbebap kitaphanada da ótkizildi. Oǵan «Alash» ádebı syılyǵynyń laýreaty, aqyn Narmahan Begalyuly, aqyn Álibek Shegebaı, «Qazaq ádebıeti» gazetiniń bas redaktory Dáýren Qýat jáne ózge de zııaly qaýym ókilderi qatysty. «Sákenniń «Ǵalamtordaǵy mahabbat» atty kitabyn aldyn ala aldyryp, ár sózine nazar aýdaryp oqydym. Bul kitap qazaq ultyna qyzmet etetin kitap dep oıladym. Asyra aıtylǵan eshteńesi joq. Qoǵamǵa syn aıtylsa, demek ol – qazaqty jóndeýdiń, qazaqqa týra joldy nusqap, kemshiligin túzeýdiń áreketi. Sákende halyq aýyz ádebıetiniń shuraıly tili bar. Jazýynda jýrnalıstik, pýblısıstik saryn da baıqalady. Biraq bul onyń kemshiligi emes, kerisinshe, ony tolyqtyryp, kórkemdigin jetildirip tur», dedi Narmahan Begalyuly. Sondaı-aq ol kitap avtoryna keıbir sóz tirkesteriniń qoldanylýyna baılanysty eskertýi men aǵalyq aqyl-keńesin de aıtyp ótti. О́zge de qalamgerler Sáken Sybanbaıdyń jýrnalıstik qyzmeti men jazýshylyq qarym-qabileti, shyǵarmashylyq izdenisi jaıly jyly lebizderin bildirdi. Jazýshynyń «Ǵalamtordaǵy mahabbat» atty kitabyna «Muńlyq», «Baqytty adam», «Úmit úıi», «Dıskrımınasııa», «Sen qandaı tátti ediń, ómir!» jáne «Bir sháýgim shaı» syndy kórkemdik deńgeıi joǵary, taǵlymdy týyndylary engen.
Túrkistan – Shymkent
