Qazaq aýylsharýashylyq ınstıtýtynyń agronomııa fakýltetin úzdik bitirgen, Tımırıazev atyndaǵy aýyl sharýashylyǵy akademııasynda bir jyldyq taǵylymdamadan ótken, odan partııanyń osyndaǵy joǵary mektebin bitirgen onyń bilimi de óz zamanynda ozyq boldy. J.Ysqaqovtyń jumysqa adaldyǵy, kez kelgen isti dóńgelentip áketetin iskerligi, baǵynyshtylaryna juǵymdylyǵy, baı tájirıbesi men tereń bilimi Pavlodar oblysy atqarý komıtetiniń tóraǵasy qyzmetin alty jyl boıy atqarǵanda da súrindirgen joq. Osy qyzmetterdiń bárinde ol halyqqa qolynyń tazalyǵymen, adamdarǵa degen sergektigimen, úlkenge qurmetpen, kishige izetpen turatyn kishipeıildigimen jaǵa bildi.
Jaqsylyq Ysqaqov 1975-1985 jyldary oblystyq atqarý komıteti tóraǵasynyń birinshi orynbasary laýazymynda júrip, onomastıkalyq komıssııanyń tóraǵasy bolǵansha Petropavlda birde-bir ǵımarattyń ataýy qazaqsha bolmaıtyn. «Sholpan», «Raýshan», «Janar» jáne t.b. dúken, balabaqsha ataýlaryn Jákeńniń jetekshiligindegi onomastıkalyq komıssııa engizdi. Al ortalyqtaǵy eń úlken, toǵyz qabatty qonaqúıdi qalalyq bıliktegiler «Kolos» dep ataımyz dep talasqanda, «Joq, «Qyzyljar» bolady», dep jeńip bergen de osy kisi bolatyn. Bul da ulttyq dúnıeni qoldaı bilgen, ulttyq múddeni umytpaǵan óz zamanynyń erligi. 1988 jyly Pavlodarda ótken respýblıkalyq aıtysqa oblystyq atqarý komıtetiniń tóraǵasy Jaqsylyq Ysqaqovtyń ózi kelip, óz qolymen júlde úlestirgenge deıin jergilikti bıliktegiler joǵaryǵa alaqtap, kóp ýaqyt boıy aıtysty ashyq qoldaı almaǵanyn da qazirgi jurt bile bermeıdi. Ol kezde qazaqy dúnıeniń bári ultshyldyqpen baılanystyrylyp, kiná taǵýǵa daıyn turatyn... Sol taptaýryndy alǵash buzǵandardyń biri de Jákeń boldy.
Naýan Naýryzdyń jarqyraǵan kúnderiniń birinde 1932 jyly dúnıege kelgen onyń 90 jyldyq mereıtoıyn oblys qana emes, respýblıka jurtshylyǵy qýanyshpen atap ótti desek, artyq emes. Jákeń Dinmuhammed Qonaev bastaǵan Qazaqstannyń elge adal qyzmet etýdi ǵana oılaǵan úlgili basshylarynyń aqyrǵysy. Ol keshegi Maqtaı Saǵdıev, Kákimbek Salyqov, Nil Bolatbaev, Vasılıı Demıdenko, Esim Shaıkın sııaqty sańlaqtarmen qatar qyzmet etip, solarmen qanattas bolǵan jan. Qazaqtyń narqasqalarynyń arasyndaǵy Vasılıı Petrovıch Jákeńe tikeleı ustaz bolǵan adam. «Jaqsylyq, qazaq keńsharlaryn ashý kerek» degen de sol Básekeń (Jákeń ózi osylaı ǵana ataıdy) bolatyn. Osydan keıin J.Ysqaqov soltústikte 12 qazaq keńsharyn ashqany belgili.
Mereıtoıdy oblys ákimi Qumar Aqsaqalov ashyp, ardaqty aqsaqaldy quttyqtap, oblys turǵyndary atynan shapan japty jáne Prezıdent Qasym-Jomart Toqaevtyń Quttyqtaý hatyn tapsyrdy. Alystan kelgen qonaqtar qatary kileń qazaqtyń jaqsylary men jaısańdarynan edi. Atap aıtqanda Erik Sultanov, Bolat Jylqyshıev, Samat Eskendirov, Qýat Esimhanov, Nurjan Áshimbetov, general Abaı Tasbolatov, ǵalymdar Ǵalymqaıyr Mutanov, Anatolıı Bashmakov jáne t.b. bolyp, bári de quttyqtaý sózderin aıtty. Senatorlar Parlament Senatynyń Tóraǵasy Máýlen Áshimbaevtyń, general A.Tasbolatov respýblıkalyq Ardagerler uıymynyń Quttyqtaý hatyn tapsyrdy. Qonaqtar arasynda Jumabek Táshenovtiń kelini Fatıma Táshenova da bolyp, mereıgerdi quttyqtady. Soltústikte ataqty aqsaqaldar arasynan bir-aq kisi Jákeńnen úlken eken. Zeınolla Oljabaev esimdi 95 jastaǵy qarııa Batyr Baıannyń tikeleı urpaǵy. 90-ǵa kelip jatqan abyzdy «qaraǵymdap» quttyqtaǵan bul aqsaqaldyń sózderi de erekshe este qaldy.
Mereıtoı ıesi óziniń sózinde elimizdiń kórkeıe túskenin kórýden áli de úmitti ekenin, Jańa Qazaqstannyń bolashaǵyna senetinin aıtty.
