«Bala barysy» oblystyq týrnıriniń ashylý rásiminde Balalar men jasóspirimderdiń ulttyq sport mektebiniń basshysy Aıbat Qabajaev jas balýandarǵa sáttilik tilep, óńirde qazaq kúresin damytýǵa úles qosyp júrgen sport ardagerlerine alǵys aıtty.
Jas sportshylardy quttyqtaǵan qalalyq bilim bóliminiń basshysy Gúlsim Orazbaeva búginde mektep qabyrǵasynda bilim alyp júrgen jasóspirimderdiń ulttyq sportqa, ásirese qazaq kúresine degen qyzyǵýshylyǵy mol ekenin atap ótip, mundaı sport jarystarynyń óskeleń urpaqty tárbıeleýdegi ónege-taǵylymy aıryqsha ekendigine toqtaldy.
– Jalpy, Qostanaı jeri kóptegen ult qaıratkerin dúnıege keltirgen kıeli meken. Keshegi Alash arystary osy eldiń jarqyn bolashaǵy úshin, búgingi jastar úshin qyzmet etti. Sport pen bilim egiz. Osy qaǵıdany jadyna túıip ósken jas jaqsy azamat bolyp qalyptasady. Bıyl Memleket basshysy Qasym-Jomart Toqaev 2022 jyldy Balalar jyly dep jarııalaǵanyn bilesizder. Prezıdent balalardyń quqyqtaryn qorǵap, daryndy balalardy qoldaý kerektigin erekshe atap ótken bolatyn. О́negeli bilim, úlgili tárbıe alý sizderdiń basty mindetterińiz. Bıyl, mine «Rýhanı jańǵyrý» baǵdarlamasyna da bes jyl tolady. Ulttyq sportymyzdy nasıhattaý osy rýhanı jańǵyrýdan bastalady. Búgin boz kilemge shyǵyp baǵyn synaıtyn jas balýandardyń bárine sáttilik serik bolsyn! – dedi bilim bóliminiń basshysy.
«Bala barysynan» úmitker órenderdiń qaı-qaısysy da osal emes. Buǵan deıin aýdandyq, oblystyq týrnırlerde ysylyp, úzdikter qatarynan kórinip júrgen kil myqtylar. Jarys qorytyndysy boıynsha júldeli orynnyń bárin Qostanaı aýdanynyń jas balýandary utyp aldy. III oryndy Dáýlet Muhabetqalı enshilese, II oryn Nurjan Amanbaevqa buıyrdy. Al qarsylas shaq keltirmegen Erlan Aıdos Qostanaı oblysynyń «Bala barysy» ataǵyn jeńip aldy.
– Tórt jyl qatarynan tynbaı jattyǵyp keledi. Shákirtimniń bolashaǵynan zor úmit kútemin. Alda Shymkentte ótetin respýblıkalyq chempıonatqa joldama aldy, sonda baǵyn synaıtyn bolady, – deıdi Aıdostyń bapkeri S.Dármenbaev.
QOSTANAI
