«Álemdegi qarjylyq naryqtar naýryz aıynda geosaıası ahýaldyń ýshyǵa túsýine baılanysty qubylmaly kúıde boldy. Syrtqy qysymdardyń el ekonomıkasyna yqpalyn azaıtý úshin jáne ishki valıýta naryǵynda teńgerim saqtaý úshin naýryz aıynyń ortasynda Ulttyq bank birneshe ret valıýta ınternvensııasyn jasady. Aı sońyndaǵy qorytyndy boıynsha ıntervesnııalardyń kólemi 990,5 mln AQSh dollaryna teń bolǵan. Basqasha aıtsaq, bırjadaǵy saýda-sattyqtyń 29%-y ıntervensııalyq sharalarǵa tıesili», dep jazady Ulttyq banktiń resmı saıty.
Al Ulttyq qordan respýblıkalyq bıýdjetke túsetin transfertterdi qamtamasyz etý úshin 890,9 mln dollar satylǵan.
«Ulttyq bankten jasalǵan ıntervensııalar men Ulttyq qordan valıýta satý úlesi bırjadaǵy jalpy-saýda sattyqtyń 55% paıyzyna teń boldy. Ulttyq bank BJZQ jáne ózge de senimgerlik basqarýdaǵy qorlardyń aktıvterine shetel valıýtasyn satý jáne satyp alý operasııalaryn júrgizgen joq. Geosaıası shıelenis qatty shıryqqan 15 naýryzda 1 AQSh dollarynyń quny 512,17 teńge boldy. Biraq, keıin ulttyq valıýta qaıta nyǵaıa bastady. 31 naýryzda KASE bırja alańyndaǵy saýda-sattyqtyń qorytyndysy boıynsha 1 dollardyń quny 467,03 teńge boldy. Iаǵnı, naýryz aıynyń basynan beri ol 5,7% nyǵaıǵan. Teńge halyqaralyq qarjy naryǵyndaǵy túzetýler men salyq tólemderi túsetin kezdiń dóp kelýi aıasynda nyǵaıyp otyr», dep jazady Ulttyq bank mamandary.
Ulttyq bank sarapshylarynyń paıymynsha, álemdegi geosaıası jaǵdaı teńge baǵamyna qysqa merizidik sıpatta áser etedi.
«Sonyń ózinde Ulttyq bank tolyqqandy ınflıasııalyq targetteýge kóshe beretinin atap ótemiz. Ol úshin ekonomıkada jeńildetilgen memlekettik nesıelendirý, aıyrbas baǵamyn erkin aınalymǵa jiberý sııaqty qurylymdyq ózgerister qajet. Ulttyq banktiń qolynda jaǵymsyz ssenarıler oryndalǵan jaǵdaıda ishki qarjy naryǵynda turaqsyzdyq boldyrmaýǵa qajet quraldardyń bári bar jáne ahýaldy baqylap otyr», delingen Ulttyq bank málimetinde.
