72 jastaǵy qarııa qarashaǵa deıin búkil eldi aralap, qoldanbaly óner sheberlerimen kezdesip, basqa óńirlerdiń turǵyndaryn Ulytaý aýdanynyń tarıhymen jáne kıeli jerlerimen tanystyrýǵa nıetti.
Jospar boıynsha, ol kúnine 40 shaqyrym jol júredi.
«Men bul marafonǵa jeti jyl boıy daıyndaldym. Meniń maqsatym – qolóner sheberlerimen kezdesip, halyqty Ulytaý tarıhymen tanystyrý. Sonyń ishinde «Kókmaısa» festıvalin nasıhattaý da bar. Men Qazaqstannyń barlyq óńirlerin aınalyp ótýdi josparlap otyrmyn. Qyzylorda, Túrkistan, Shymkentten bastaımyn. Ári qaraı Taraz, Almaty, Taldyqorǵan qalalaryna jol tartamyn. Qazaqstannyń úzdik qolónershileriniń tizimin jasaǵym keledi. Meniń búkil baǵytym áleýmettik jelilerde jarııalanady», deıdi saıahatshy.
Qarııanyń jaıaý marafony «Ulytaýǵa bardyń ba?» dep atalady. Alys jolǵa shyǵar aldynda Sársenbaı Qotyrashov «Ulytaý» murajaı-qoryǵyndaǵy áriptesterimen kezdesip, óziniń baǵyty týraly aıtyp berdi.
