Bul sýrette sonshalyqty alyp bara jatqan oqıǵa da, tartys ta joq. Kádimgi qarapaıym qazaq otbasyndaǵy kórinis. Aýyldaǵy úı dep aıtýǵa bolady. Jer ústelge jaıylǵan dastarqan basynda oramal tartqan, jasy alpysqa jaqyndap qalǵan apa, onyń eki jaǵynda, osy úıge qandaıda bir jaqyndyǵy bar er adam men onyń zaıyby otyr. Qonaqqa kelgen eki kishkentaıdyń da aýzy bos emes. Solarǵa shaı quıyp berip otyrǵan jas kelinshektiń júzi qýanyshtan bal-bul jaınaıdy. Ústeldiń irgesinde onshaqty kese tizilip tur. Soǵan qaraǵanda úıge taǵy da qonaqtar keletin sekildi. Sýretten osy shańyraqtaǵy aırandaı uıyǵan bereke men birlikti, qonaqjaılylyqty, bastysy, qazaqy meıirimdilikti kóresiz. Osyny avtor ózi jas bolsa da tereń túısinip, boıaý túsimen shynaıy beınelegen.
Jalpy beıneleý óneri de ádebıettegi sekildi, realızm, modernızm, natýralızm, avangardızm deısiz be, túrli aǵymdarǵa baı. Alaıda óner týyndysy óz topyraǵynan jaralyp, ulttyq naqyshta bolǵanda ǵana onyń ǵumyry uzaq bolatyny anyq. Árıne, bul shyǵarmashylyq ıesi tek dástúrdi ǵana ustansyn degen sóz emes, túrli aǵymdardyń da damyp, óner kókjıeginiń keńeıgeni jón. Degenmen, óz basym, kórkem shyǵarma bolsyn, kartına bolsyn, odan aldymen ulttyq erekshelikti kútemin.
Osy turǵydan kelgende, Nurbolattyń týyndylary qazaqy naqyshqa toly, syrly boıaýǵa baı ekenin baıqaısyz.
Onyń «Bozjyra shatqaly» degen taǵy bir tamasha eńbegi bar. Bozjyra – Mańǵystaý oblysyndaǵy jumbaq taý. Qazir bul jerdi kórýge elimizdiń turǵyndary ǵana emes, sheteldik týrıster de yntyǵyp turady. Ǵalymdar Bozjyra taýynyń jumbaq formalary 10 mıllıon jyl buryn bolǵan ejelgi muhıttyń túbindegi shógindilerdiń jeldený prosesinde paıda bolǵan desedi. Osy ǵajaıyp shatqaldy sýretshi óz kartınasynda áserli beınelegen. Taý eteginde jaıylyp júrgen túıelerdiń beınesi de kózimizge jyly ushyraıdy.
Sondaı-aq sýretshiniń «Oshaq» degen týyndysynyń da jóni bólek. Osy sýretti kórgende aýyldaǵy bala kúnim esime túsip, anamnyń oshaq jaǵyp, baýyrsaq pisiretin sáti kóz aldyma keldi. Dál osy kórinis kartınada aına-qatesiz bederlengen. Halqymyz oshaqty – kıe sanaǵan. Úlkenderdiń «Oshaǵyń sónbesin» dep bata beretini de tegin emes. Avtor óz jumysynda osy qasıetti uǵymdy, ata-baba dástúrin búginmen sátti úılestirgen. Bul jaıynda sýretshi bir suhbatynda: «Bala kúnimizde sheshelerimiz «oshaqty teppe», «oshaqqa sý quıma», «oshaqtyń tóbesine shyqpa» degendi jıi aıtatyn. Biz osydan-aq oshaqtyń shańyraq úshin úlken kıesi baryn bilip óstik, oǵan qurmetpen qaradyq. Meniń uǵymymda oshaq pen otbasy egiz uǵym ári bul tatýlyq pen baqytty ómirdiń sımvoly. Shyǵarmama osyny arqaý ettim», deıdi.
Nurbolat óz shyǵarmashylyǵynda aýyl jáne otbasy qundylyqtary taqyrybyna maqsatty túrde barǵan sekildi. Ásirese onyń «Tynyshtyq» degen kartınasyndaǵy ákesi men balasynyń jyp-jyly úıde shahmat oınap, mamyrajaı otyrǵan sátindegi kórinisi júrekti shym etkizedi. Týyndynyń ataýy da tegin emes, shynynda, tynysh, beıbit ómir bolǵan jerde ǵana bereke, yrys, baqyttyń jaqyn júretindigin jete túsingendeımiz. Sondaı-aq «Nemere», «Áńgime», «Oıý», «Aq dastarqan», «Tórteý», «Kir», «Aqpan» sekildi kartınalaryndaǵy keıipkerler de kádimgi ózimiz kúnde kórip júrgen adamdar beınesi bolǵanymen, solardyń bolmysy arqyly qoǵamdaǵy kópshilik baıqaı bermeıtin syrly sátterdi, názik kórinisterdi boıaý qudiretimen kórkem kestelegen. Onyń tabıǵat kórinisterin beınelegen týyndylary da tartymdylyǵymen jyly áserge bóleıdi.
Daryndy jastyń ónerine bilikti mamandar da beıjaı qaraǵan emes. Belgili ónertanýshy Samal Mamytova jas qylqalam sheberi alǵashqy jumystarynan bastap, ómir sýretterin áserli beıneleıtindigin jazady. «Nurbolattyń keskindemesi – beıneli keskindeme men ımpressıonızmniń erekshe qospasy, ol ózine unaıtyn kórinisterdi jıi ózgertedi, «jyly» men «sýyq» tústerdi aıqyn túrde salystyra, túrli-tústi kontrastardy qoldana otyryp tús «dybysyn» arttyrýǵa tyrysady. Onyń týyndylaryndaǵy saǵymnan bas tartýǵa kompozısııalyq sheshimder, faktýranyń túrliligi áser etedi», deıdi.
Búginge deıin Nurbolat Asqardyń Nur-Sultan men Almaty qalasynda ǵana emes, 2018 jyly Italııanyń Florensııa qalasynda «О́mir» atty jeke kórmesi ótip, sheteldikterdi ónerimen tánti etti. 2016 jyly «Shabyt» XIX halyqaralyq shyǵarmashylyq jastar festıvalinde «Beıneleý óneri» atalymynda Gran-prı júldesin jeńip aldy. Basqa da óner baıqaýlarynda júldeger atandy.
Sýretshige álemdegi barlyq ádemilikti kóre biletin qasıet berilgen. Osy qasıet bizdiń keıipkerimizdiń boıynda molynan bar. Onyń ár týyndysynan sulýlyq pen jylylyqtyń, meıirim men ádeptiń, qýanysh pen baqyttyń jyly lebi esip turady, siz sonyń shýaǵyna shomylǵandaı kúı keshesiz.
