Aýyl turǵyndaryn aýdan ortalyǵymen baılanystyratyn jalǵyz joldyń ústin telegeı teńizge aınaldyryp jibergen qarqyny jaman qyzyl sýdyń tereńdigi 50-60 santımetrge deıin jetedi. Jol boıyndaǵy qaterli aýmaqta bolyp jatqan tabıǵı apat tórtinshi sáýir kúni áleýmettik jelige tarap ketken vıdeoda baıandalǵan:
– Jylda aıtamyz. Biraq muny qarap jatqan aýdan ákimi de, aýyl ákimi de joq. Ne ári, ne beri óte almaı turmyz. Kóliktiń ishinde qanshama kishkentaı balalar otyr. Erteń aýyldan bireý aýyra qalsa, ne bolady? Muny aýdannyń basshylary biledi. Anaý «Ýaz»-dyń ishi tolǵan adam. Qaıda bararymyzdy bilmeı turmyz, – deıdi vıdeony taratqan jolaýshy.
Qabyrǵa aýyldyq okrýginiń ákimi Serik Baıkenovtyń aıtýynsha, 2017 jyly qatty sý tasqyny bolyp, dál osy jerdi 5-6 jerden qubyrlarymen qosa aǵyzyp jyryp ketken. Keıin ol jerdiń qubyrlary ornyna qaıtadan ornatylyp, ústine qıyrshyq tas tóselipti.
– Basqa jerden taǵy jyrylyp ketpeý úshin kólemi 2-3 shaqyrymdaı jolǵa sý ótip ketetindeı etip greıder tósep qoıǵanbyz. Qazir qarǵyn sý sol greıderdiń ústimen júrip jatyr. Áleýmettik jelide taraǵan vıdeoda eki jol belgisi tur, kórdińizder me? Negizi ol jerdi sý jyrmaǵan. Qyzyl sý sol sý ótýge arnalǵan ótkeldiń ústinen ótip jatyr. Biraq bıyl qardyń sýy mol. Kezinde basshylyq qyzmetterde bolǵan kópti kórgen úlken kisilerdiń ózderi buryn-sońdy mundaı sý tasqyny bolyp kórgen joq dep otyr. Qarǵyn sýdyń qatty tasyǵany sondaı, ótkelge qoıylǵan qubyrlar sýdy ótkizip úlgere almaı jatyr. Búkil sý qyrdan keledi ǵoı. Bul endi tabıǵattyń tosyn qubylysy. Mine, qazir greıderdi jaǵalap, at ústinde ketip baramyn. Bólimshelerdi aralap shyǵý kerek. О́ıtkeni kólik qatynasy úzildi, mashına júre almaıdy. Tasyp jatqany – Qandyqara, Taldyqara degen qyrdyń sýy. 2 sáýirde birinshi saıdan sý kele bastaǵanda-aq dabyl qaǵyp, jurtqa eskerttim. Ertesinde Kemerdiń saıynan sý júrip ketti. Sol kúni ózimizdiń «Aýyldastar» degen chatymyzǵa «Amankeldimen eki arada qatynas toqtaıdy. Sondyqtan ári-beri qaraı shyǵyp ketip júrmeńizder, apatty jaǵdaıǵa dýshar bolasyzdar, jol joq» dep jazyp jiberdim. Keıbir turǵyndar sony tyńdamaı, elemeı shyǵyp ketip, jolda qalyp qıyndyqqa tap bolyp jatyr. Abyroı bolǵanda, Kemer degen bólimshedegi azamattar batpaqqa batqan kólikterdi traktormen tartyp shyǵaryp alýda. Buryn sý tasyǵanda bir jetiden keıin ótkel berip, traktor, asty bıik «Ýaz», «Gaz-66» sııaqty aýyr tehnıkalar ótetin. Al bıyl joldyń qashan ashylatyny belgisiz. Sýdyń aryny óte qatty. Saǵat saıyn ósip jatyr. Ana jerge on tehnıka ákelip bógese de dál qazir oǵan kúshteri jetpeıdi, – dedi ákim.
Jergilikti tótenshe jaǵdaı qyzmeti ókilderiniń aıtýynsha, sý tasqynyna daıyndyq barysynda aýyldyq okrýgke qarasty Qabyrǵa, Jańataı, Alakól aýylynyń turǵyndaryna erte kóktemde keletin qaýipti kezeńge aldyn ala qamdanýdyń mańyzdy ekeni túsindirilip, aldyn-ala jetkilikti mólsherde azyq-túlik jetkizilgen. Eldi mekender men mal jaıylymyna sý tasqynynan qaýip joq.
Qazir sý tasyp jatqan qaýipti aýmaqta arnaıy baqylaý beketi jasaqtalyp, 2 tehnıka, jergilikti atqarýshy organ ókilderi men aýdandyq polısııa, tótenshe jaǵdaı bólimderiniń qyzmetkerleri kúni-túni kezekshilikte tur.
Qostanaı oblysy,
Amankeldi aýdany
