Infografıkany jasaǵan Amangeldi Qııas, «EQ»
Ornyqty damý uǵymy maǵan jiti tanys. Nege deseńiz, men elimizdiń «jasyl» qaýymdastyǵy, ıaǵnı ekologııalyq birlestiktiń ókilimin. Munyń aldynda BUU Damý baǵdarlamasynyń ornyqty damý boıynsha bólimin basqarǵandyqtan kez kelgen memlekettiń turaqty damýyn saıası sheshimsiz júzege asyrý qıyn ekenin jaqsy túsinetinmin. Memleket basshysy osy aıtylǵan usynystardyń keleshekte qoǵamnyń ıgiligine qyzmet etetinin birneshe ret jetkizdi.
Mańyzdysy sol, Prezıdent kótergen strategııalyq bastamalardyń baǵyty aıqyn. Konstıtýsııaǵa 30-dan astam túzetý engizip, 20-dan artyq zańdy ózgertý máselesi kún tártibine qoıylyp otyr. Bul – aýqymdy jumysty qajet etetin sharýa. Keıbireýler nege Parlamentti birden taratyp, saılaý ótkizbeske dep suraıdy. Biraq muny iske asyrý úshin tıisti zańnamaǵa ózgerister engizý qajet ekenin jaqsy túsinemiz.
Ekinshiden, Joldaýdyń basty tusynda úsh oblysty qurý jóninde bastama kóterildi. Atap aıtqanda, Ulytaý, Jetisý jáne Abaı oblystary. Kez kelgen Qazaqstan azamaty sekildi osy óńirlerde meniń de kóptegen dosym turady. Olar tarıhı ádildiktiń ornyqqanyna dán rıza. Máselen, Jezqazǵan oblysy buryn da bolǵan. Qazir kenshiler óńirinde qazba baılyqtary sarqylyp bitken ken oryndary óte kóp. Sondyqtan jańa jumys oryndaryn ashý asa mańyzdy. Al jeke aldyna Abaı oblysynyń qurylýy – semeılikterdiń erteden ańsap kele jatqan qalaýlarynyń biri. Almaty óńiri úshin de bul oryndy sheshim dep sanaımyn. Eger halyq Qapshaǵaı qalasynyń ataýyn Qonaevqa ózgertýdi quptasa, atalǵan óńirdiń kórkeıe túsýine jol ashylady degen senimdemiz.
Basqa da kóptegen jaqsy ózgeris pen usynys aıtyldy. Sol sebepti Parlament pen Prezıdent Ákimshiligine qyrýar jumys atqarýǵa týra keledi.
Prezıdent pen óńir ákimderiniń saıası partııalardyń quramynda bolmaýy kerek degen usynysty da qoldaımyn. Bul kez kelgen partııanyń múddelerin ilgeriletý úshin ákimshilik resýrstardy paıdalaný yqtımaldyǵyn aldyn alady dep esepteımin. Sonymen qatar osy arqyly kóppartııalyq pen básekelestikke múmkindik berilip, jańa saıası mádenıet qalyptasady. Osy rette biz keıingi kezderi «jasyl» partııa qurý jóninde bastama kóterip kelemiz. Mundaı sheshim qabyldaýǵa elimizde oryn alǵan ýtılalym men Kóbeıtuz máselesine baılanysty rezonasty oqıǵalar ıtermeledi. Bolashaqta biz osyǵan kelemiz dep oılaımyn.
Arman QAShQYNBEKOV,
Qazaqstannyń jańǵyrmaly energetıka qaýymdastyǵynyń bas dırektory
