Balǵyn balýandar beldesti

Úsh kúnge sozylǵan beldesýler barysynda Almaty oblysynyń jasóspirim qyzdary ózderiniń óte jaqsy babynda ekendikterin baıqatyp, jergilikti jankúıerlerdi qýanyshqa bóledi. Tarqatyp aıtsaq, Toqjan Dáýletkeldi (44 kılo), Jibek Qulymbetova (47 kılo), Aıajan Muqtarǵalı (54 kılo) jáne Nurshat Kemelhanqyzy (72 kılo) altynnan alqa taqsa, Uljan Dáýletkeldi (44 kılo), Ińkár Tólepbergen (59 kılo), Araı Tóleýbaı (59 kılo), Aıajan Jeńishanqyzy (80 kılo) jáne Gaýhar Qanatbek (80 kılo) úzdik úshtikti túıindedi. Nátıjesinde, 4 altyn jáne 5 qola medaldy qorjynǵa salǵan jetisýlyq qyzdar jalpykomandalyq esepte birinshi oryndy jeńip aldy. 

– Almaty oblysynyń balýan qyzdary óz deńgeıinde óner kórsetti. Jyl saıyn ótetin el birinshiliginde biz keminde úsh-tórt altynnan oljalap, jalpy esepte kósh bastaýdy jaqsy bir dástúrge aınaldyrdyq. Sonyń nátıjesinde qyzdarymyz álem jáne qurlyqtyq dodalarǵa úzdiksiz qatysyp keledi. Máselen, 2020 jyly Serbııada Gúzel Aıýpova men Arýjan Arman qola medaldy moıyndaryna ilse, 2021 jyly О́zbekstanda Ánel Qaıratqyzy dál sol mejeden kórindi. Bul rette biz tek álem birinshilikteri jaıynda ǵana aıtyp otyrmyz. Onyń syrtynda Azııa chem­pıonaty jáne basqa da halyqaralyq jarystarda olja salyp júrmiz, – deıdi Almaty oblysynyń jaóspirimder qurama­synyń aǵa jattyqtyrýshysy Qaırat Jarmuhamedov.

Qyzdar arasynda ótken jarystyń ózge salmaq dárejelerinde jambyldyq Sara Shýgaeva (50 kılo), qyzylordalyq Zarına Muratasyl (59 kılo) men Ásemaı Rústemova (65 kılo), túrkistandyq Ul­bosyn Ádilova (80 kılo) jáne shymkenttik Alına О́mirbek (+80 kılo) altyn tuǵyrǵa kóterildi.

Uldardyń saıysynda Jambyl obly­synan kelgen jas órender oza shap­ty. Atalǵan komandanyń sapynda Al­mat Ahmatǵalı (71 kılo), Beıbarys Nuǵ­man (79 kılo) jáne Beıbarys Raıs (+79 kılo) qarsylas shaq keltirmese, Áden Dinmuhamed (53 kılo), Álı Álimbı (64 kı­lo) jáne Dıas Turlybek (71 kılo) aqtyq synda ǵana súrindi. Al Erik Nurdáýlet (58 kılo) qola medaldy moınyna ildi. Sondaı-aq bas júldeni oljalaǵandar arasynda qyzylordalyq Nurjan Týmyrzaev (49 kılo), atyraýlyq Aqnıet Ańsaǵan (53 kılo), mańǵystaýlyq Qýanyshbek Kómekov (58 kılo), qaraǵan­dylyq Arman Nurjanov (64 kılo) pen Aqjol Dúısenbaev (88 kılo) jáne tal­dy­qorǵandyq Damır Ahet (98 kılo) bar.

– Sońǵy kezderi el birinshilikteriniń barlyǵynda Jetisý óńiriniń qyzdary aldaryna jan salmaı júrgeni barshaǵa aıan. Biraq uldarymyzdyń qarqyny sál báseń edi. Iá, júldegerler sanatynan kóringen shákirtterimiz jeterlik. Biraq bizdi bir qynjyltqan jaıt – 2019 jyldan beri birde-bir órenimizdiń chempıondyq tuǵyrǵa kóterile almaýy. Sol olqylyqtyń ornyn toltyrý shin Taldyqorǵandaǵy jarys qarsańynda jergilikti bapkerler esh aıanbaı eńbek etti. Nátıjesi jaman bolǵan joq. Birinshilikti basynan aıaǵyna deıin bir demmen ótkizgen Damır Ahet 98 kılo salmaqta bas júldeni qanjyǵasyna baılasa, taǵy bes sportshymyz kúmis pen qola medaldy ıelendi. Biraq biz munymen shektelip qalmaımyz. Aldaǵy jarystarda búgingi tabysymyzdy eseleý úshin barynsha kúsh salamyz, – dep Almaty oblysy sambo federasııasynyń prezıdenti Berik Jetpisbaev aqtaryla sóıledi.

Balǵyn balýandardyń boz kilemdegi beldesýlerin Respýblıka sambo fede­rasııasynyń prezıdenti Aıdos Aqja­nov, sol uıymnyń vıse-prezıdenti Ma­nar­bek Bısekenov, Qazaqstan ulttyq quramasynyń bas bapkeri Birjan Iman­hanov bastaǵan bir top basshy men maıtalman maman tabjylmaı tamashalady. Endi Taldyqorǵanda ótken jarystyń qory­tyndysy boıynsha jasóspirimder qura­masy jasaqtalyp, olar bıylǵy jyl­dyń ekinshi jartysynda ótetin álem jáne Azııa birinshilikterine daıyndalady.