Qasym-Jomart Toqaevqa mınıstrliktiń byltyrǵy atqarǵan jumystarynyń qorytyndylary, sıfrlandyrý jáne IT salasynyń damý perspektıvalary jóninde, sondaı-aq telekommýnıkasııa baǵytyndaǵy jumystyń sapasyn arttyrýǵa qatysty Prezıdent tapsyrmalarynyń júzege asyrylýy týraly esep berildi.
Mınıstrdiń aıtýynsha, adam múddesine qyzmet etetin servısterdi engizý aıasynda eń qajetti degen 18 qujat jeke derekterdi qorǵaý sharalaryn mindetti túrde saqtaı otyryp, platformany tanymal etý arqyly sıfrlyq formatqa aýystyrylǵan.
Budan bólek Baǵdat Mýsın Qasym-Jomart Toqaevqa «sıfrlyq teńsizdikti» joıý, ınternetpen qamtamasyz etýge jáne onyń sapasyna qatysty baqylaý sharalaryn kúsheıtý jónindegi tapsyrmalarynyń oryndalýy týraly da esep berdi. Byltyr 628 eldi mekende Internet sapasy jaqsartylsa, bıyl taǵy da 140 aýylda osyndaı jumystar júrgizilmek.
Prezıdentke mobıldi operatorlardyń Nur-Sultan, Almaty, Shymkent qalalarynda 5G tehnologııasynyń synaqtan sátti ótkizilgeni týraly baıandaldy. 2022 jyly respýblıkalyq mańyzy bar qalalarda kommersııalyq maqsatta iske qosý josparlanyp otyr.
Sonymen qatar mınıstr telekommýnıkasııa naryǵyn odan ári damytý josparyn usyndy. Atap aıtqanda, «Qazaqtelekom» aksıonerlik qoǵamynyń kompanııalar tobyn monopolııadan aryltý jumystary júrgiziledi, básekelestik ortany jaqsartýǵa baǵyttalǵan birqatar zańnamalyq bastama qabyldanbaq.
Baǵdat Mýsın Prezıdentke Qazaqstandy sıfrlandyrý aıasynda energetıka, jer qoınaýyn paıdalaný, densaýlyq saqtaý, áleýmettik qorǵaý, jerdi qashyqtan zonttaý spýtnıkterin paıdalana otyryp, sý jáne jer resýrstaryn monıtorıngteý salasyndaǵy birqatar strategııalyq joba týraly baıandady.
IT salasyn damytýǵa basa mán berildi. Astana Hub tehnoparkiniń jumysy, sonyń ishinde sheteldik IT kompanııalardy Qazaqstanǵa ákelý týraly aıtyldy.
Prezıdent otandyq IT sektordy qoldaýǵa baǵyttalǵan naqty sharalar ázirleýge jáne halyqaralyq naryqta jetistikke jetken sheteldik IT kompanııalarǵa kómek kórsetýdi tapsyrdy.
Kezdesý barysynda mınıstr «UAT» aksıonerlik qoǵamynyń resýrstary negizinde osyndaı jobalardy júzege asyrýda tájirıbesi bar otandyq IT kompanııalardyń sarapshylaryn tarta otyryp, sıfrlandyrý platformasyn qurýdy usyndy.
