Memlekettik qoldaýdyń nátıjesinde qazaqstandyq ǵalymdar sheteldik ǵalymdarmen birge medısına, nano jáne bıotehnologııalar, jasandy ıntellekt, geologııa, mıneraldy jáne kómirsýtekti shıkizatty óńdeý, aýyl sharýashylyǵy ónimderiniń qaýipsizdigi jáne ekologııa salasyndaǵy zamanaýı jobalarǵa qatysyp jatyr. Barlyq joba Ǵylym qorynyń qoldaýymen júzege asyryldy.
Ǵylym qory basqarmasynyń tóraǵasy Aryn Orsarıev: «Sońǵy 2 jylda 130-ǵa jýyq joba qarjylandyryldy. Qor – ǵylymı jáne ǵylymı-tehnıkalyq qyzmet nátıjelerin kommersııalandyrý boıynsha jobalardy granttyq qarjylandyrý operatory. Búginde biz ǵylymdy qajet etetin 120 óndiristi iske qostyq, onyń 15-i ónimin eksportqa shyǵaryp úlgerdi. Sonymen qatar 1,5 myńǵa jýyq jumys orny quryldy. Zııatkerlik menshik avtorlary men ǵylymı jobalardy paıdalanatyn kásiporyndar arasynda 45 lısenzııalyq kelisim jasaldy», dedi.
Mınıstrliktiń málimdeýinshe, ǵylymı jobalardyń arasynda kobalt-57 radıoızotopy, jel jáne kún energııasyn óndiretin generatorlar, zeńge qarsy preparat, medısınalyq, taǵamdyq jáne turǵyn úı-jaılardy sanıtarlyq tazartýǵa arnalǵan bıologııalyq ónimder, sút sarysýy negizindegi sýsyndar, probıotıkter jáne t.b. bar.
Aıtalyq, Ǵylym qorynyń qoldaýymen «Antıgen» ǵylymı-óndiristik kásipornynyń ǵalymdary kýltýraldyq vaksına óndirý tehnologııasyn ázirledi. Bul joba úı jáne jabaıy janýarlardyń qutyrý aýrýynyń taralýyn aldyn alýǵa baǵyttalǵan. Búginde vaksınany Grýzııaǵa jetkizý uıymdastyryldy.
Mıkrobıologııa jáne vırýsologııa ınstıtýtynyń ǵalymdary sarysý negizindegi taǵamdyq qundylyǵy joǵary otandyq sýsyn shyǵarýdy qolǵa aldy. Sýsynnyń búırek pen baýyrdyń jumysyna, sondaı-aq búkil ishektiń jumysyna paıdasy zor. Sonymen birge revmatızmdegi qabynýdy azaıtýǵa kómektesedi, gıpertonııa kezinde qysymdy qalypqa keltirip, ateroskleroz qaýpin azaıtady.
