О́tken senbide oblys ákiminiń orynbasary V.Ionenko men oblystyq Tótenshe jaǵdaı departamentiniń basshysy, azamattyq qorǵanys polkovnıgi Birjan Kárimov bastaǵan jumys toby «ES-145» tikushaǵymen oblys ortalyǵynyń mańaıyna, sondaı-aq Qostanaı, Áýlıekól, Naýyrzym aýdandarynyń aýmaǵyna áýeden baqylaý júrgizdi. Monıtorıngtik top mingen tikushaq Naýryzym aýdanynyń Býrevestnık aýylyna qonyp, aýyl ishinde ornalasqan bógetterdegi erigen qar sýynan tónetin qater joq ekenin anyqtady.
– Áýlıekól aýdanyndaǵy Dıev eldi mekeniniń tóńireginde, Naýryzym óńirindegi О́leńdi aýylynyń mańaıynda áli de qar jatyr. Degenmen, biz ushyp ótken úsh aýdannyń aýmaǵynda qardyń kóbi erigen. Saı-salada jatqan qyzyl sýdan eldi mekenderge tónip turǵan qaýip joq. Zertteý nátıjeleri boıynsha Naýryzym aýdanynyń ákimi Q.Ábishevke Býrevestnık aýylynda da, jalpy Naýryzym aýdany boıynsha da belsendi qar erý kezeńinde sý tasqyny qaýpin azaıtý jáne tótenshe jaǵdaılarǵa jol bermeý boıynsha tapsyrmalar berildi, – dedi bul jóninde oblystyq TJD basshysy.
Atalǵan jumys toby jeksenbi kúni Altynsarın, Qarasý aýdandary men Áýlıekól aýdanynyń shyǵysynda áýeden barlaý jumystaryn júrgizip, Qostanaı aýdanyna qarasty Rybnoe, Sverdlov, Altynsarın aýdanyndaǵy Novoselov, Qarasý óńirindegi Vostok, Qaramyrza, Koshevoı, Selınnyı, Oktıabrskıı, Kóktal eldi mekenderiniń mańaıyndaǵy sý tasqynynan tónetin qaýip deńgeıin anyqtady.
Tótenshe jaǵdaı mamandarynyń málimetinshe, óńirde sý tasqynynan keletin qaýiptiń beti qaıtqan syńaıly. Biraq bıyl oblystyń ońtústik aýdandarynda qarǵyn sýdyń qarqyny qatty boldy. Saldarynan keıbir eldi mekenderdiń arasynda jol qatynasy úzilip qalyp jatyr. Mysaly, taıaýda Arqalyq qalasy mańyndaǵy eldi mekenderge baratyn joldyń sýaǵaryn qyzyl sý jyryp ketip, onyń ústinde paıda bolǵan shuńqyrǵa dalada jaıylyp júrgen jylqy qulaǵan. Sondaı-aq Jangeldın aýdanynyń ortalyǵy, Torǵaıdan Aqshyǵanaq aýylyna baratyn joldyń 15 jáne 25-shi shaqyrymy buzylǵan. Al Arqalyq qalasynyń shetine ornalasqan jer úılerdiń ishine aýla men kóshedegi erigen qardyń sýy kirip ketken.
Qostanaı oblysy
