Úıde bir-birimen aǵylshynsha sóılesetin nemereleriniń «qupııasyn» bilýge qumartqan aqsaqaldyń tilge degen qyzyǵýshylyǵy oıanǵan. Búginde aqsaqal 1500 sóz úırengen. Bul kórsetkishke toqmeıilsimeı aǵylshyn tilin meńgerýdi jetildire túsýdi josparlap otyr. Aptasyna úsh ret tilderdi oqytý ortalyǵyna baryp, sabaqqa qatysady. «Til úırený – búgingi kúnniń basty talaby. Eger qyzyǵýshylyq bolsa, bilim alý jas talǵamaıdy. Ákimdikte tegin úıretetin mekeme de bar eken. Bardym. Alǵashqy kýrsty bitirdim. Qazir úıde nemerelerimmen aǵylshynsha sóılesetin kezderimiz kóp», deıdi 82 jastaǵy Qurmanbek qarııa. Kentaý qalalyq tilderdi oqytý ortalyǵynyń dırektory Aqmaral О́tepbaeva aqsaqaldyń úzdik til úırenýshi ekenin aıtady. «Atamyz sabaqqa offlaın qatysyp, aǵylshyn tilin nólden bastap úırendi. Qarapaıym frazalar men erejelerdi, oqý jáne jazýdy meńgerdi. Qazir aǵylshynsha qoıylǵan suraqtarǵa óz betinshe jaýap bere alady. Ol kisi til úırenýshilerdiń ishindegi eń belsendisi, tártiptisi bola bildi. Sabaqtan birde-bir ret qalǵan emes», deıdi ortalyq dırektory. Aqsaqal «A-1 – beginner» deńgeıin tolyq meńgerip, sertıfıkat alǵan. Aǵylshyn tilindegi sózderdi qurap oqı alady.
Túrkistan oblysy
