Jańa jınaqqa sýretshi ómiriniń ár kezeńinde salǵan portretteri, taqyryptyq kartınalary, abstraksııa, peızaj, natıýrmort sýretteri toptastyrylǵan.
Mazmundy sharada belgili ǵalym, qoǵam qaıratkeri Myrzataı Joldasbekov qylqalam sheberiniń kartınalaryndaǵy beınelengen oqıǵalar men zattardyń tarıhı mańyzy zor ekendigine toqtaldy.
«Qazaqtyń báıgesin, kókparyn, ulttyq aspaptaryn boıaýdyń túsimen tamasha beınelegen. «Balalyqtan danalyqqa jol» atty sıkl Ál-Farabı ómir súrgen ǵasyrdy shynaıy sýretteıdi. Januzaq Músápirdiń jumystary osymen de qundy. Biz tarıhymyzdy umytpaı, ulttyq qundylyqtarǵa zamanaýı sıpat berip, alǵa jyljımyz» dedi qoǵam qaıratkeri.
Sondaı-aq tanystyrylym barysynda akademık Kárimbek Qurmanálıev, aqyn Dáýletkereı Kápuly, «Rýhanı jańǵyrý» KMM basshysy Abylaıhan Qalnazarov, «Qasıetti Qazaqstan» ǵylymı-zertteý ortalyǵynyń dırektory Batyrhan Jumabaev sóz alyp, sýretshiniń shyǵarmashylyǵy týraly izgi lebizderin bildirdi.
Búginde talant ıesiniń kóptegen eńbegi Qytaı, Polsha, Germanııa, Reseı sekildi 30-dan asa eldiń mýzeı qory men jeke kolleksıonerler muraǵatynda saqtalǵan. Ásirese onyń portret janryndaǵy qoltańbasyn erekshe aıtýǵa bolady. Avtor óz esimimen arnaıy kitap shyǵarý kópten oıynda júrgendigin sóz ete kelip:
«Qarııanyń sózi kıiz kitaptaǵydaı» dep babalarymyz aıtqandaı, sýretshilik óner ekzıstensııasyn jan-jaqty ashatyn eńbekte shyǵarmashylyq taǵdyrymnyń buralańdaryn da jeke kolleksııa men otbasylyq fotosýrettermen bekitip otyrdym. Meni synshylar «Alash órkenıetinen serııaly dúnıe jasaý men beıneleýdiń sakraldy bilimin tanytýshy» dep ataıdy. Sol býyrqanǵan boıaýlardy jurtshylyq kitaptan óz kózimen kórip, qolyna ustasa deımin», dedi ol.
Aıta keteıik, Januzaq Músápirdiń shyǵarmashylyǵy san qyrly. Televızııada rejısser bolyp, birqatar derekti fılm túsirdi. Músin ónerimen de aınalysty. Buǵan deıin de sýretshiniń «Qara shańyraǵym», «Altyn uıa mektebim», «О́mir ótkelderi» atty kitaptary jaryq kórgen.
