Batyrbek Seısenbaevtyń esimi jankúıerlerge jaqsy tanys. Nebári 54 jyl ǵumyr keshken azamat Pavlodar óńirinde osy kúres túriniń órkendeýine ólsheýsiz úles qosty. Bir ǵana mysal, 1996 jyly Atlantada ótken Olımpııa oıyndaryna Qazaqstannyń jeti dzıýdoshysy qatyssa, sonyń tórteýi dál osy Seısenbaevtyń shákirtteri edi. Olar – KSRO chempıony jáne sol jarystyń eki dúrkin júldegeri Sergeı Áshimov, Azııanyń úsh dúrkin chempıony, Azııa oıyndarynyń qola júldegeri Sergeı Shákimov, Azııa oıyndary men qurlyq birinshiliginiń kúmis júldegeri Serik Álimjanov jáne Azııa chempıonatynyń eki dúrkin qola júldegeri Ahat Áshirov. Bul jerde biz tórtjyldyqtyń basty dodasynda óner kórsetken apaıtósterdiń ǵana esimderin atadyq. Odan bólek, Batyrbekten tálim-tárıbe alǵan sportshylardyń qalyń shoǵyry kóptegen respýblıkalyq jáne halyqaralyq dodada atoı salǵanyn aıta ketken abzal.
Taıaýda qazaq sportynyń shejireshisi Qydyrbek Rysbektiń «Qazaqtyń 90 bapkeri» atty qundy kitaby jaryq kórdi. Qarymdy qalamger sol jerde bapker Batyrbekti bylaı dep sýrettegen eken: «Batyrbek aǵanyń kóńili qazaqtyń baıtaq dalasyndaı edi. Soǵan saı rýhy Alataýdaı asqaq bolatyn. Ultym degende janyn julyp berýge ázir azamattyń biri ári biregeıi de Batyrbek Seısenbaev edi. Iá, qazaqta bapker kóp, sol qalyń qoldaı samsaǵan jattyqtyrýshylardyń ishinde aıqasqa júıriginiń biri ári orny bólek, ordaly ulyń osy Batyrbek. Iyqty shalqaq tastap, jarqyldaı kúlip, janartaýdaı jalyndap júretin esil aǵataıdyń myna jalǵannan ozǵanyna da 23 jyldyń júzi bolypty. Jer júzi júırigin saılap, namysyn qaırap baratyn dúrmekti synǵa muqym qazaqtan jalǵyz ózin qosyp jiberseń, sol alamannyń etegine oratylmaı, tórine ozatyn, Alashtyń ary men aqylyna, tegeýrini men oraq tiline syn keltirmeı josylatyn joıdasyz batyryń ári kósheli shesheniń osy Batyrbek edi-aý!».
Jarystyń ózine keler bolsaq, Pavlodarda tóselgen tatamıde ataqtary alysqa jaıylǵan birneshe beldi balýan óner kórsetti. Máselen, 73 kılo salmaqta beldesken áıgili Eset Qýanovtyń qarqynyna eshkim shydaı alǵan joq. Fınalda ol taldyqorǵandyq Darhan Qoıbaǵardy qapy qaldyrdy. Bir aıta keterligi, sambodan álem chempıony jáne sol jarystyń eki dúrkin júldegeri, Álem sýperkýbogy men kýbogynyń birneshe dúrkin ıegeri, jabyq keshendegi Azııa oıyndarynyń jeńimpazy degen ataǵy bar Aqtóbe oblysynyń ókili keıingi kezderi dzıýdoshylardyń dodasynda da eleýli tabystarǵa qol jetkizip júr.
81 kılo salmaqta Qazaqstan ulttyq qurama komandasynyń múshesi, birqatar halyqaralyq týrnırdiń júldegeri Bekádil Shaımerdenov Pavlodarda shashasyna shań juqtyrmady. Jambyl oblysynyń óreni sheshýshi saıysta elimizdiń taǵy bir tanymal balýany nursultandyq Mádı Amangeldiden aılasyn asyrdy. Asa aýyr salmaqta kil myqtylar aıqasty. Fınalda Shyǵys Qazaqstan oblysynan kelgen qos alyp – Ádil Orazbaev pen Erasyl Qajybaev bas júldeni ózara sarapqa saldy. Nátıjesinde, altyn Ádilge buıyrsa, Erasyl kúmispen kúpteldi. Al taldyqorǵandyq Mádı Edilbaev pen aqtóbelik Elaman Erǵalıev qola medaldardy moıyndaryna ildi.
О́zge salmaq dárejelerinde myna dzıýdoshylar dara shyqty: 60 kılo – Nurdáýlet Amanqosov (Qyzylorda), 66 kılo – Bolat Bilál (Túrkistan), 90 kılo – Qýanysh Rataev (ShQO) jáne 100 kılo – Nurlyhan Sharhan (Qyzylorda). Sol sekildi kúmis pen qola medaldyń da denin qazaq balýandary oljalady. Shetelden kelgen bir ǵana sportshynyń jeńis tuǵyryna kóterilýge kúsh-jigeri jetti. Ol – 90 kılo salmaqta ekinshi oryn alǵan Reseı dzıýdoshysy Nazar Menshıkov.
