Qyzdardyń qarqyny qýantarlyq

Búrynǵy Keńes Odaǵy quramynda bolǵan memleketter arasynda Reseı ózgelerden kóshilgeri tur. Álem chempıonatynda olar 60 júlde aldy. Onyń 24-i altyn, 10-y kúmis jáne 26-sy qola medal. Sol 11 jarystyń beseýinde reseılikter jalpy esepte kósh bastasa (2001, 2005, 2010, 2014, 2019), bir márte ekinshi (2006) jáne eki ret (2002, 2012) úshinshi oryndy ıelendi.

Ekinshi orynda – Qazaqstan quramasy. Bizdiń qyzdar óz tarıhynda 18 márte jeńis tuǵyryna kóte­rildi. Anyqtap aıtsaq, 5 altyn, 4 kúmis jáne 9 qolany oljalady. Alǵashqy bolyp qalyń jankúıer­lerge medaldyń syńǵyryn estirtken Nazgúl Boranbaeva. 46 kılo salmaq dárejesinde baq synaǵan elordalyq qyz 2006 jyly Nıý-Delıde qola júldeni ıelendi. Jalpy, bul otbasy jaıynda uzaq áńgimeleýge bolady. Ákesi Serik kıkbokstan Qazaqstannyń eńbek sińirgen jattyqtyrýshysy. Boranbaevanyń ózinen bólek, týǵan eki ápkesi de sporttyń osy túrimen shuǵyldanyp, halyqaralyq arenalarda eleýli tabystarǵa qol jetkizdi. Nazgúldiń kúıeýi Qanat Ábýtálipovtiń de esimi jankúıerlerge jaqsy tanys. Ol – bokstan Qazaqstannyń birneshe dúrkin chempıony, Azııa birinshiliginiń júldegeri, Dúnıejúzilik boks se­rııasy (WSB) dodasynyń jeńim­pazy, Beıjiń men London Olımpıa­dalaryna qatysýshy.

2008 jyly Nınboda 70 kılo salmaqta Elena Kolsova qolaǵa qol sozsa, 2010 jyly Brıdjtaýnnan eki sportshymyz oljaly oraldy. Marına Volnova (81 kılo) ekinshi jáne Nazgúl Boranbaeva (48 kılo) úshinshi oryndy enshiledi. 2012 jyly Sınhýandaoda da dál sondaı nátıjege qol jetkizdik. Juldyz Mamatqulova (+81 kılo) kúmis jáne Nazym Qyzaıbaı (48 kılo) qola medaldy moıyndaryna ildi.

2014 jyly qos qazaq qyzynyń aıshyqty ónerine qulshyna qol soqtyq. Chedjýdegi jarysta Nazym Qyzaıbaı aldyna jan salmaı, altynnan alqa taqty. Osylaısha, onyń esimi Qazaqstannan shyqqan tuńǵysh álem chempıony retinde tarıhta qaldy. 81 kılo salmaqta synǵa túsken Lázzat Kúngeıbaevanyń da sondaı múmkindigi boldy. Alaıda ol aqtyq aıqasqa deıin alqynbaı jetkenimen, sheshýshi tusta reseılik Zemfıra Magomedalıevaǵa ese jiberip, kúmis medaldy qanaǵat tutty. Osy qos júldeniń arqasynda jerlesterimiz komandalyq esepte tórtinshi oryndy ıelendi.

2016 jyly tórtkúl dúnıeniń myqtylary Astanada bas qosty. Bul jarysta 4 altyn jáne 2 qola medaldy oljalaǵan Qazaqstan quramasy jal­py esepte kósh bastady. Atap aıt­saq, Nazym Qyzaıbaı qatarynan ekinshi ret álem chempıony atandy. Onyń jeńisti jolyn Dına Jolaman (54 kılo), Valentına Halzova (69 kılo) jáne Lázzat Kúngeıbaeva (+81 kılo) jalǵastyrdy. Al Jaına Sheker­bekova (51 kılo) men Aıjan Qojabekova (57 kılo) úzdik úshtikti túıindedi.

О́z jerimizdegi aıqyn jeńis biz­diń qyzdarymyzdy jigerlendire túsetin shyǵar dep oılaǵan edik, bir­aq qatelesken ekenbiz. Sońǵy eki jarystaǵy nátı­jemiz osy sózimizdiń aıqyn dáleli. 2018 jyly Nıý-Delıde Jaına Sheker­bekova (51 kılo) ekinshi, al Karına Ibragımova (60 kılo) úshin­shi satyǵa taban tiredi. Osy kórsetkishpen «TOP-10» komandanyń qataryna ázer iliksek, 2019 jyly Ulan-Ýdede tek Mılana Safronova (64 kılo) men Dına Islambekovanyń (+81 kılo) júldegerler sanatyna qosylýǵa kúsh-jigerleri jetti.

Olımpııa oıyndarynda burynǵy «baýyrlas» respýblıkalardyń tek úsheýine ǵana júlde alý baqyty buıyrdy. Olar – Reseı, Qazaqstan jáne Tájikstan.  2012 jyly Londonda Reseıdiń eki boksshysy fınalǵa shyǵyp, ekeýi de utyldy. Sofııa Ochı­gava (60 kılo) ırlandııalyq Ketı Teılordan, Nadejda Torlopova (75 kılo) amerıkalyq Klaressı Shıldsten jeńildi. Qazaqstandyq Marına Volnova (75 kılo) men tájikstandyq Mavzýna Chorıeva (60 kılo) úshinshi satyǵa jaıǵasty.

2016 jyly Rıo-de-Janeıroda alaýy tutanǵan Olımpıadada 75 kılo salmaqta kúsh synasqan Darıǵa Shákimova qola medaldy moınyna ilse, reseılik Anastasııa Belıakova (60 kılo) dál sol mejeden kórindi. 2021 jyly Tokıodaǵy jarysta postkeńestik elder arasynda Reseıdiń týy astynda óner kórsetken daǵystandyq Zemfıra Magomedalıeva úshinshi oryndy ıelendi. Al ózge komandalar tórtjyldyqtyń basty dodasynan quralaqan qaıtty.

Álem chempıonattarynyń nátıjesi

(1993-2019 jyldar aralyǵy)

Olımpııa oıyndarynyń nátıjesi

(1996-2021 jyldar aralyǵy)