«Paster-fermentasııa» halyqaralyq jobasyn qorytyndylaýǵa arnalǵan beınekonferensııaǵa Fransııanyń Qazaqstandaǵy elshisi Dıde Kaness, Jıýl Grevı kolledjiniń dırektory Katrın Mesne, atalǵan jobanyń jetekshisi professor Danıel Raıshvarg jáne Nazarbaev zııatkerlik mektebi men Polını mektebiniń oqýshylary qatysty.
Ǵylymı joba barysynda eki eldiń oqýshylary taǵam ónerkásibindegi hımııalyq transformasııalar týraly bilimderin jetildirip, irimshik pen sút qyshqylyn óndirýdegi ashytý úderisteri tóńireginde tájirıbe almasty.
– Atalǵan joba aıasynda negizinen ulttyq taǵamdardyń quramyn, daıyndalý ádisterin, onyń adam densaýlyǵyna qanshalyqty paıdaly nemese zııandy ekenin zerttedik. Biz qurt, qymyz, irimshik sııaqty ulttyq taǵamdardyń ekologııalyq taza, tabıǵı ónim ekenin ǵylymı jolmen dáleldep shyqtyq. Polını mektebiniń oqýshylarymen bıologııa, hımııa jáne basqa da salalar boıynsha tájirıbe almasyp, bilimimizdi arttyrdyq. «Paster-fermentasııa» halyqaralyq jobasynyń jetekshisi, professor Danıel Raıshvarg biz júrgizgen sút ónimderine qatysty zertteý jumystaryn joǵary baǵalap, qymyz ben qurtty halyqaralyq ulttyq taǵamdar kitabyna engizetinin aıtty. Muny biz óz eńbegimizdiń nátıjesi dep bilemiz, – dedi jobaǵa qatysqan 9-synyp oqýshysy Darııa Shýnýsheva.
Konferensııanyń sońynda Fransııanyń Qazaqstandaǵy elshisi Dıde Kaness halyqaralyq ǵylymı jobaǵa qatysqan oqýshylarǵa alǵys aıtyp, eki eldiń arasynda ózara dostyq qarym-qatynas pen ǵylymı-mádenı yntymaqtastyqtyń odan ári damı beretinine senim bildirdi. Sondaı-aq elshi aldaǵy ýaqytta Fransııadaǵy joǵary oqý oryndarynda grant boıynsha bilim alǵysy keletin NZM túlekterine múmkin- diginshe qoldaý kórsetetinin aıtty.
QOSTANAI
