Aýrý muǵalim mektepte qaıtip sabaq beredi?

Atyraýdaǵy orta mektepterdiń birinde týberkýlezdiń ashyq túrimen aýyratyn psıhologtyń jumys isteıtindigi anyqtaldy. Bul derekti gazet tilshisine Atyraý oblystyq tutynýshylardyń quqyǵyn qorǵaý basqarmasynyń bólim basshysy Araı Qaısenǵalıeva jetkizdi. Jalpy jurtshylyq, sonyń ishinde mektep jasyndaǵy balalar úshin óte qaýipti juqpaly dertke shaldyqqan psıholog jyl saıyn medısınalyq tekseristen ótip turǵan. Tek bıylǵy tekseristen ótkende ǵana týberkýlezdiń ashyq túrimen aýyratyndyǵy anyq­­­­tal­ǵan. Alaıda, psıholog jumys istegen mektepte karantın jarııalanǵan joq. Qazir mektepke dezınfeksııa jasalǵan. Sonymen birge, syrqatqa shaldyqqan psıhologpen qarym-qatynasta bol­ǵan 114 qyzmetker men 154 oqýshy tekseristen ótkizilýde. О́ıtkeni, týberkýlezdiń ashyq túrine shaldyqqan psıholog joǵary synyptarǵa ózin ózi taný páninen de sabaq berip kelgen eken. Sonymen birge, Maqat aýda­ny­nyń ortalyǵy Maqat kentindegi bir bala­­baqshanyń jáne Dossor kentin­degi eki mekteptiń ashanasynan ishek taıaq­­­sha­synyń bakterııalary anyq­talyp otyr. Mektepter men balabaqsha­da­ǵy sanı­tarlyq jaǵdaıdyń talap­qa saı emestigin anyqtaǵan Maqat aýda­ny­nyń pro­kýratýra qyzmetkerleri 936 ba­la­nyń quqyǵyn qorǵap qaldy. Áıt­pe­gende, osynsha bala ishek taıaqsha­sy bakterııasyn juqtyrýy ábden múmkin edi. Joldasbek ShО́PEǴUL, «Egemen Qazaqstan». Atyraý oblysy.