Tyńnyń «jyry» taýsylǵasyn ózge ult ókilderi aýyldan qaıta qonys aýdarady. Solardan 5-6 orys otbasy qalyp qoıdy. Sonyń ishinde Raıa apanyń da otbasy bar. Aýyldaǵylardyń bári ony «Raıa» deıdi, tek biz sekildi shı borbaılar ǵana «Raıa apa» dep ásireleımiz. О́zi orta boıly, juqaltań, kóp sózi joq, birtoǵa jan. Zeınetkerlikke shyqqanǵa deıin sovhozda býhgalter boldy. El adamdary onyń joldasyn «leıtenant» deýshi edi. Shyn esimi, kim ekenin bilmedim. Nátinde, soǵysqa qatysyp, sodan leıtenant shenimen oralsa kerek. Bala kúnimde men ony kórdim. Únemi motosıklmen júretin. Birde ájem ekeýmizdi motosıklge otyrǵyzyp, qonaqqa aparyp tastady. Ájemniń oǵan «spa-sı-bo» dep sozyp aıtqany esimde. Biraq ol kisiniń qalaı qaıtys bolǵanyn bilmeımin, áıteýir artynda uly men qyz qaldy. Sol eki shyraǵy Raıa apaǵa úmit syılap, qaıǵydan qulap ketpeýge kúsh berdi. Ulynyń esimi – Vıtıa. Endi ony aýyldyń bar adamy jaqsy kórdi. О́zi de eńbekqor, ákesi sekildi aqkóńil, adal azamat bolyp erjetti. Qazaqshaǵa sýdaı. Únemi ákesiniń motosıklin minip júredi. Aqyry ajaly osy kólikten bolyp, ómirden tym jas ketti. Al qyzy aýyldan qalaǵa erte ketip, sonda turmysqa shyqqan.
Raıa apa otaǵasy men balasynan aıyrylyp, jalǵyz qaldy. Biraq jalǵyz qaldym dep moıymady. О́zi tyń ıgerý jyldary salynǵan aýyldaǵy eki qabatty úıde turdy. Onyń úıi anadaıdan jumyrtqadaı aǵaryp kórinedi. Aýlasy, saraıynyń mańaıy tap-taza, kese-kóldeneń shóp kezdespeıdi. Aýyldan baý-baqshany ondaı egetin adamdy emge tappaısyz. Eki qabatty úıiniń terezesine deıin gúl ósiredi. Odan bólek, tańerteń ózenge yrǵalyp basyp bara jatatyn qaz-úıregin aıtsańshy! Qorasy da malǵa toly. Qysqasy, Raıa apa aýyldaǵy baqýatty turǵyndardyń biri boldy. Shyn máninde, ony eńbekpen kógergen jan dep aıtýǵa bolady.
Toqsanynshy jyldardaǵy qıynshylyq elge ońaı tıgen joq. Ujymdyq sharýashylyq tarap, jumyssyzdyq beleń aldy. Aýyl adamdary tirshilik qamymen qalaǵa qonys aýdardy. Biraq ol kisi jyly ornyn sýytpady. Qaıta kóship jatqandarǵa: «Osyndaı jumaq jerdi qıyp, qaıda barasyzdar?» dep toqtam aıtyp, sabyrǵa shaqyryp júrdi.
Keıin biz de arman qýyp, qalaǵa keldik. Elge jolymyz sırek túsetin boldy.
Aýylǵa barǵanda apaıǵa arnaıy sálemdesemin. Anamdy surap, jany qalmaıdy. Ýaqyt degen bir orynda tura ma, bala kúnimiz de biz ókshe týflı kıip, tip-tik júretin Raıa apa da eńkish tartyp, qartaıǵan. Alaıda úı sharýasynan qalǵan emes. Áıteýir, saraıynyń mańaıynda túrtinip júredi.
Osydan úsh jyl buryn, seksenge taıaǵan shaǵynda Raıa apa ómirden ótti. Ony sońǵy saparǵa aýyl adamdary bar joralǵysymen shyǵaryp saldy. О́zi amanat etip aıtqan kúıeýi men balasynyń janyna jerledi.
Qazir aýyldaǵy Raıa apanyń eki qabatty úıi bos tur...
