Foto: championat.com
Bir matchta – jeti gol
Keshe ÝEFA Chempıondar lıgasynyń alǵashqy jartylaı fınaldyq matchynda «Manchester Sıtı» óz alańynda Madrıdtiń «Realyn» qabyldady.
Tóreshi belgi bergen bette birden alǵa umtylǵan aǵylshyndar ekinshi mınýtta esep ashty. Rııad Marezdiń bergen dobyn Kevın De Brıýıne baspen uryp, qaqpaǵa sylq etkizdi – 1:0. Arada týra toǵyz mınýt ótken soń Gabrıel Jezýs oń jaq buryshty dál kózdedi – 2:0. Tek birinshi kezeń bel ortadan asqannan keıin ǵana qonaqtar esterin jııa bastady. 33-mınýtta Ferlan Mendıdiń bergen dobyn Kárim Benzema qaqyrata teýip, nysanaǵa dál túsirdi – 2:1.
Ekinshi kezeń de «Manchester Sıtıdiń» damylsyz shabýylymen bastaldy. 53-mınýtta Fıl Foden mergendik tanytty – 3:1. Alaıda madrıdtikter esh sasqan joq. Kózdi ashyp-jumǵansha birneshe qorǵaýshynyń arasynan sytylyp shyqqan Vınısıýs Jýnıor esep aıyrmashylyǵyn qysqartty – 3:2. 74-mınýtta Bernardý Sılva keremet gol soqty – 4:2. 81-mınýtta «Realdyń» shabýylynan keıin dop Aımerık Laporttyń qolyna tıdi. Tóreshi esh oılanbastan 11 metrlik núkteni meńzedi. Benzemanyń soqqysyna Tıbo Kýrtýa tosqaýyl bola almady – 4:3. Endi qarymta match 5 mamyrda Madrıdte ótedi.
Shırek fınalǵa shyqty
Bul kúnderi Nıý-Delıde 14 jasqa deıingi tennısshiler arasyndaǵy álem chempıonatynyń Azııa jáne Tynyq muhıt aımaǵy boıynsha irikteý týrnıri ótýde.
D tobynda óner kórsetken Qazaqstan quramasy qatarynan eki kezdesýde jeńiske jetip, kózdegen maqsatyna qol jetkizdi. Tusaýkeser oıynyn Indonezııamen ótkizgen jerlesterimiz olardy oısyrata utty. Kelesi kúni Shrı-Lankamen sheberlik baıqasty. Alǵashynda Danıel Tazabekov Kader Bashıtke bas kótertpedi – 6:2, 6:1. Odan keıin Tennis Europe (TE) reıtınginde kósh bastap turǵan Zańǵar Nurlanuly Lıtý Djabandýdyń tas-talqanyn shyǵardy – 6:2, 6:0. Juptyq saıysta Qazaq eli namysyn Zańǵarmen birge Damır Jalǵasbaı qorǵady. Bul básekede de jas órenderimizdiń ústemdigi esh kúmán týǵyzǵan joq.
Keshe otandastarymyz Pákistanmen kúsh synasty. Bul oıyn bizge asa mańyzdy emes. О́ıtkeni Indonezııa men Shrı-Lankany shań qaptyrǵannan keıin-aq, qazaqstandyqtar pleı-off joldamasyna ıelik etti.
«Ordabasy» kósh bastady
Fýtboldan Qazaqstan Premer-lıgasynyń segizinshi týry óz máresine jetti. Osy kezeńdegi alǵashqy eki kezdesý Shymkent pen Qostanaı qalalarynda ótti.
Qajymuqan Muńaıtpasov atyndaǵy stadıonda «Ordabasy» «Qaıratty» qabyldady. 11-mınýtta qonaqtardyń qaqpasyna 11 metrlik aıyp doby belgilendi. Núktege kelgen Elhan Astanov nysanany dál kózdedi. 30-mınýtta Artýr Shýshenachev tarazy basyn teńestirse, 52-mınýtta Serj Nıýadzı kezdesýdiń sońǵy núktesin qoıdy – 2:1. Osy jeńistiń arqasynda upaı sanyn 14-ke jetkizgen «Ordabasy» jarys kestesinde birinshi orynǵa shyqty.
«Tobyl» men «Astana» arasyndaǵy báseke de óte tartysty ótti. Alań ıeleriniń sapyndaǵy chernogorııalyq legıoner Jarko Tomashevıch birinshi kezeńde esep ashty. Úziliske sanaýly sekýndtar qalǵanda qostanaılyqtardyń ekinshi goldy soǵýyna tamasha múmkindigi boldy. Biraq Igor Sergeev 11 metrlik núkteden múlt ketti. Esesine astanalyqtar 55-mınýtta esepti teńestirdi – 1:1. Bul goldyń avtory – Pedrý Eýjenıo.
