Álemdegi eń beldi uıymnyń jarysynda jerlesterimizdiń arasynan alǵashqy bolyp 33 jastaǵy Jalǵas Jumaǵulov (14-6) jekpe-jekke shyǵady. 5 maýsymda ol AQSh-tyń Las-Vegas qalasynda ótetin týrnırde jergilikti sportshy Djeff Molınamen kúsh synasady. 24 jastaǵy amerıkalyq saıypqyrannyń osy sport túrin serik etkeli bes jyldan asty. Sol aralyqta 12 kezdesý ótkizip, 10 ret jeńiske jetti. Bir qyzyǵy, Molına alǵashqy úsh básekeniń ekeýinde jeńilistiń kermek dámin tatty. Esesine odan keıin qatarynan toǵyz aıqasta óziniń myqtylyǵyn moıyndatty. Ol brazılııalyq djıý-djıtsýdy jaqsy meńgergen. О́te jyldam jáne aıaqpen de, qolmen de jaqsy jumys isteı biledi. Djefftiń qandasymyzǵa qaraǵanda boıy birshama uzyn. Jalǵaspen jekpe-jekke shyǵatynyn estigen bette Molına qatty qýanǵan kórinedi. Ol: «О́te jaqsy boldy. Men Jumaǵulovty zeınetke jiberemin», dep málimdepti.
Las-Vegasta Jalǵasqa jeńis aýadaı qajet. Sebebi Aqtóbeniń týmasy UFC-de ótkizgen tórt kezdesýdiń úsheýinde jeńildi. Sońǵy ret byltyrǵy jeltoqsan aıynda angolalyq Manel Kapeden oısyraı utyldy. Eger osylaı jalǵasa beretin bolsa, amerıkalyq promoýshen Jumaǵulovpen kelsimshartty uzartpaýy da múmkin.
Dál sondaı jaǵdaıdy Aqtóbeniń taǵy bir ókili Sergeı Morozov ta basynan keshirýde. Bıyl jazda 33 jasqa tolǵaly otyrǵan ol UFC-degi úsh básekeniń ekeýinde qarsylastaryna ese jiberdi. Bıyl qysta brazılııalyq Dýglas Sılva de Andrade otandasymyzdy qylqyndyryp tastady. Bul joly Morozov 25 maýsymda ótedi dep josparlanǵan básekede Raýlıan Paıvamen kúsh synasady. 26 jastaǵy Brazılııa ókiliniń osydan eki jyl buryn bizdiń Jalǵas Jumaǵulovty upaı sanymen utqany esimizde. Oktagonǵa barlyǵy 25 márte shyqqan Andrade sonyń 21-inde basymdyq tanytty. Jeti básekeni merziminen buryn aıaqtady.
26 maýsymda Shavqat Rahmonov jartylaı orta salmaqtaǵy úzdikter tiziminde toǵyzynshy orynda turǵan AQSh-tyń beldi sportshysy Nıl Megnımen aıqasady. Keıingi eki jyl aralyǵynda alty kezdesý ótkizip, sonyń beseýinde basymdyq tanytqan 35 jastaǵy brazılııalyq djıý-djıtsý sheberiniń myqtylyǵy esh kúmán týǵyzbaıdy. Barlyǵy 34 báseke ótkizgen Megnı 26 márte jeńis toıyn toılady. 10 básekeni merziminen buryn aıaqtady. Eger Shavqat bilgeninen jańylmaı, osy joly da qarsylasyn ońdyrmaı sabasa, onda qazaqtyń qaısar uly óz salmaq dárejesindegi «TOP-10» sańlaqtyń sanatyna qosylýy da ǵajap emes. Osylaısha, eshkimnen jeńilip kórmegen 27 jastaǵy Rahmonov birte-birte chempıondyq tuǵyrǵa jaqyndaıdy. Sol sátti kúlli Alash jurty kópten beri taǵatsyzdana kútýde. Ázirge ol reıtıngte 15-orynda tur. Bul – Qazaqstannyń sportshylary arasyndaǵy eń úzdik kórsetkish.
5 maýsymdaǵy Movsar Evloev pen 19 maýsymdaǵy Damır Ismaǵulovtyń jekpe-jekterin de jerlesterimiz taǵatsyzdana kútýde. Bul sportshylar Reseıdiń týy astynda óner kórsetip júrgenimen, ekeýiniń de Qazaqstanǵa bótendigi joq. 31 jastaǵy Damır Orynbordyń qazaǵy. 2014 jyldan beri MMA-men aınalysyp júrgen ol 24 kezdesý ótkizip, 13 márte mereıi ústem boldy. 13 básekeni merziminen buryn aıaqtady. Ismaǵulov UFC-de tórt jekpe-jek ótkizip, barlyǵynda basymdyq tanytty. Alaıda onyń reıtıngte tym baıaý joǵarylaýynyń sebebi – beldi promoýshendegi óz básekeleriniń barlyǵyn upaı sanymen utqandyǵy. Sonymen qatar byltyr qandasymyz salmaq lımıtin saqtaı almaı, sonyń saldarynan reseılik Magomed Mýstafaevpen jekpe-jekke shyqpady. Bul jaǵdaı da keri áserin tıgizdi. Bir qýantarlyǵy, Damır barlyq jarysta oktagonǵa Reseımen qosa, Qazaqstannyń da Kók baıraǵyn kóterip shyǵady.
Las-Vegasta Ismaǵulov Grýzııada týyp-ósip, keıinnen Shvesııaǵa qonys aýdarǵan 30 jastaǵy Gýram Kýtateladzemen kúsh synasady. Qarsylasynyń rekordy – 14 kezdesý, 12 jeńis (8 nokaýt), 2 jeńilis. Sońǵy ret Shvesııanyń ókili 2020 jyldyń 17 qazanynda Abý-Dabıde ótken jekpe-jekte polshalyq Mateýsh Gemrotty upaı sanymen utty.
Ingýshetııada dúnıege kelgen 28 jastaǵy Movsar Evloev qazaqstandyq Arlan MMA Pro Team klýbynyń týy astynda óner kórsetýde. Kezinde onyń Sergeı Morozovty aıqyn utyp, M-1 uıymynyń altyn belbeýin sátti qorǵaǵany qalyń kórermenniń esinde. Ázirge Movsar eshkimnen jeńilgen emes. Las-Vegasta ol jergilikti sportshy Den Igemen (15-5) sheberlik baıqasady.
UFC-den bólek, basqa da beldi uıymdar birneshe joǵary deńgeıdegi jarystar ótkizýdi kózdep otyr. Máselen, ASA uıymy jeńil salmaqta kúsh synasyp júrgen eń úzdik segiz sportshynyń basyn qosyp, Gran-Prı dodasyn uıymdastyrmaq. Júlde qory 1 mıllıon AQSh dollaryn qurap otyrǵan jarysta 30 jastaǵy Artem Reznıkov óner kórsetedi. Shyǵys Qazaqstan oblysynyń Rıdder qalasynda týyp-ósken otandasymyz – reseılik promoýshendegi eń myqty faıterlerdiń biri. Jalpy sany 28 jekpe-jek ótkizgen ol sonyń 22-sinde basym boldy. 17 qarsylasyn esinen tandyrdy. Bir ǵajaby, Artem sońǵy bes jyl aralyǵynda segiz ret aıqas alańyna shyǵyp, barlyǵynda jeńis toıyn toılady.
17 maýsymda Sochıdegi Red Arena kesheninde ótetin týrnırdiń alǵashqy aınalymyndaǵy basty jekpe-jeginde Reznıkov Davı Ramospen aıqasady. 35 jastaǵy Brazılııanyń betkeustary kezinde UFC men Bellator syndy ataqty promoýshenderde aıqasty. 14 kezdesýdiń 10-yn jeńispen aıaqtady. Sonyń segizinde aıqyn basymdyqqa ıe boldy. Bir aıta ketetin jaıt, ol tórt jeńilistiń barlyǵynda upaı sanymen ese jiberdi. Sońǵy eki kezdesýinde Reseı juldyzdary – Islam Mahachev pen Arman Sarýkıanǵa jol bergennen keıin óziniń sporttyq mansabyn ASA-da jalǵastyrýdy jón kórdi.
Dańqy jer jarǵan Habıb Nýrmagomedov irtegasyn qalaýshy jáne qojaıyny bolyp tabylatyn Eagle FC lıgasynda sáýir aıynda jalaýy jelbireıdi dep josparlanǵan jarystyń keıinge shegerilgeni belgili. Shamasy ol mamyrdyń sońy nemese maýsym aıynyń alǵashqy jartysynda ótedi. Atalǵan týrnırde Qazaqstannyń eki tanymal sportshysy Dáýren Ermekov (15-5) pen Igor Svırıd (18-10) saıysqa túsedi dep kútilýde. Dáýren osy uıymnyń chempıony Farýdın Odılovpen (12-2-2) aıqasady. Tájikstannyń ókili osydan tórt jyl buryn bizdiń Shavqat Rahmonovpen kezdesip, úshinshi raýndta ese jibergen bolatyn. Al qandasymyzdyń Farýdınnen basqa qarsylastarynyń barlyǵyn birinshi nemese ekinshi kezeńde utqanyn jankúıerler jaqsy biledi. Osy jaıttyń ózi-aq tájiktiń osal emestigin ańǵartady. Al kezinde ONE Championship promoýsheniniń chempıondyq belbeýin ıelengen Svırıd reseılik Gamzat Hıramagomedovpen (9-1) judyryqtasady.
