Eń úlken qoldaýdy mashına jasaý, agrobıznes jáne metallýrgııa salalaryndaǵy óndirýshiler aldy.
Bul yntalandyrý sharasy mınıstrdiń 2015 jylǵy 9 jeltoqsandaǵy buıryǵymen bekitilgen Eńbek ónimdiligin arttyrýǵa jáne aýmaqtyq klasterlerdi damytýǵa baǵyttalǵan ındýstrııalyq-ınnovasııalyq qyzmet sýbektilerine memlekettik qoldaý kórsetý qaǵıdalary aıasynda júzege asyrylady.
Nátıjesinde otandyq kásiporyndar sheteldik mamandar men sarapshylardy tarta otyryp, óndiriste jańa tehnologııalardy ıgerip, óndiris kólemin ulǵaıtty, óndiristik sıkldegi shyǵyndardy ońtaılandyrdy, ónimniń assortımentin keńeıtip, sapasyn arttyrdy, sondaı-aq óndiristegi pozısııalaryn nyǵaıtty. Naryqqa 50-den astam zamanaýı avtomattandyrylǵan basqarý júıesi engizildi, 200-den astam jańa óndiristik jeliler men jabdyqtar ornatyldy.
Jalpy, memleketten ótemaqy alǵan kásiporyndar osy jyldar ishinde qyzmetinde oń nátıje kórsetti. Olar jıyntyqta óndiristi 50%-dan astamǵa ulǵaıtty, ónimniń jańa túrleri paıda boldy, ónimdilik 63%-ǵa, kásipkerlik tabys eki esege, jalpy salyq 3 esege ósti.
Qazirgi ýaqytta «QazIndustry» AQ ónerkásipti memlekettik yntalandyrý operatorlarynyń biri retinde «Indýstrııalyq saıasat týraly» jańa Zańdy iske asyrý aıasynda qoldanystaǵy memlekettik yntalandyrýlarǵa ózgerister men tolyqtyrýlar engizýde.
«Osylaısha, ózgerister kásiporynnyń quzyrettiligin arttyrýǵa qatysty sharalardy engizdi. Qyzmetkerlerdiń biliktiligin arttyrý úshin ótemaqy tóleý merzimin, onyń ishinde kadrlardy qaıta daıarlaýdy 3 aıǵa deıin ulǵaıtý boıynsha usynystar engizilýde. Sondaı-aq avtomattandyrylǵan júıelerdi damytýǵa, onyń ishinde lısenzııalyq baǵdarlamalyq qamtamasyz etýdi satyp alýǵa ketken shyǵyndardy óteý qarastyrylǵan. Otandyq IT-kompanııalardy qoldaý maqsatynda otandyq sheshimdi satyp alý úshin shyǵyndardy óteý somasyn 40-tan 50%-ǵa deıin arttyrý usynylýda. Erejedegi negizgi ózgeris óteletin qarjy somasyna sáıkes qarsy mindettemelerdi engizý bolyp tabylady», delingen habarlamada.
