Partııanyń áleýmettik jelidegi paraqshasynda senator, «Aýyl» halyqtyq-demokratııalyq patrıottyq partııasynyń tóraǵasy bylaı dep oı bólisti:
«Memleket basshysy Qasym-Jomart Toqaev «Ata zańǵa ózgerister men tolyqtyrýlar engizý jónidegi» usynystardy barlyq halyqtyq referendýmǵa shyǵarýdy usyndy. Konstıtýsııa engiziletin ózgerister biraz ýaqyttan beri bizdiń qoǵamda pikirtalastar týdyryp jatqany jalpyǵa aıan. Bul qazirgi qoǵamdaǵy kún tártibinen túspeı kele jatqan eń ózekti taqyryptardyń biri desek te bolady. Osy ýaqytqa deıin talqylaý men tartysý bar da, naqty sheshimdi qadam joq edi.
Prezıdent halqymyz úshin taǵdyrsheshti máseleni saıası kúshterdiń, múddeli toptardyń tartysyna salmaı, jalpyhalyqtyq referendým arqyly sheshýdi usynyp otyr. Bul zańdyq, saıası teńdik, tipti ulttyq qaýipsizdik turǵysynan alǵanda eń durys, ári ádil sheshim dep oılaımyn.
Rasynda da «Jańa Qazaqstan» tujyrymdamasyn «sóz buıdaǵa» aınaldyrmaý kerek. Elimizdiń árbir azamaty bul tujyrymdamanyń negizgi fılosofııasyn uǵyna bilýi, sezine bilýi tıis. Bul úshin bılik tarapynan ǵana emes, qoǵamdyq kúshter men azamattyq ınstıtýttar tarapynan da naqty qadamdar jasalýy tıis.
Eger Prezıdenttiń usynysy qabyldanyp, jalpyulttyq referendým jarııalanatyn bolsa, men óz basym Qazaqstan Respýblıkasynyń azamaty retinde elimizdiń árbir azamatyn sol Referendýmǵa qatysýǵa shaqyrar edim.
Referendýmǵa qatysyp, daýys berý arqyly ár azamat óziniń Jańa Qazaqstandy qalyptastyrýǵa úlesin qosa alady dep bilemin.»
