Referendým degenimiz halyqtyń saıası erkin tikeleı bildiretin qural bolǵanymen, biz sııaqty táýelsizdikten keıin ómirge aralasqan urpaq ony múldem kórgen joq. Halyq uzaq jyldar boıy saıası prosesterden shettep qaldy. Memleket taǵdyryn sheshý at tóbelindeı azǵantaı toptyń ǵana quzyrynda boldy.
Halyq úshin asa mańyzdy sheshimder Parlamentte talqylanyp, komıssııalarda tar aýqymda talqylanýlar júrdi. Osylaısha jurttyń kóp bóligi shette qaldy, saıası ózgeriske qatysý múmkindiginen aıyryldy.
Burynǵy Prezıdent kezinde merziminen buryn, túrli syltaýlarmen burmalanyp ótkizilgen osyndaı birneshe saılaýda azamattardyń daýysy, úmiti, senimi urlandy. Bir adamnyń qolyna shekten tys bılik shoǵyrlandyryldy. Onyń arty keshegi qańtar oqıǵasyna ákelgenine bárimiz kýá boldyq.
Budan bylaı basqasha bolýǵa tıis. Halyq taǵdyryn bir adam sheshetin ýaqyt kelmeske ketti. Shyn máninde úlken ózgerister dáýirine aıaq bastyq. Tarıhtyń ashy sabaǵynan qajetti qorytyndy jasaı otyryp, Jańa Qazaqstan quramyz dep nıet ettik. Eski tásildermen jańa respýblıka qura almaımyz. Jańa Qazaqstan halyqtyń erkimen bastalýǵa tıis. Saıası jańarýdy jurtymyz tikeleı túısinip, óz bolashaǵy óz qolynda ekenin seziný úshin osyndaı zor tarıhı múmkindik berilip otyr.
Biz osy múmkindikti barynsha utymdy paıdalanyp, demokratııalyq jańǵyrý jolyna tússek eken degen tilegim bar. Aldaǵy referendýmǵa – el ómirin jańartar túbegeıli saıası betburysqa bárimiz atsalysaıyq!
Ýaıs ERSAIYNULY,
Ulttyq qoǵamdyq senim keńesiniń múshesi
