Shalqarda grek-rım kúresiniń qalyptasqan jaqsy mektebi jáne jeńispen órilgen ózindik dástúri bar. Barlyq myqtylardy tizbektemeı-aq, bul óńirden KSRO halyqtary spartakıadasy men Búkilodaqtyq Ýnıversıadanyń jeńimpazy, KSRO chempıonatynyń kúmis júldegeri, KSRO kýbogynyń ıegeri Esenkeldi Batyrǵarın men álem chempıonatynyń eki dúrkin júldegeri, Azııa oıyndarynda úshinshi oryndy ıelenip, qurlyq birinshiliginde tórt ret jeńis tuǵyryna kóterilgen Meırambek Aınaǵulovtyń shyqqanyn aıtsaq ta jetkilikti. Mine, sol jarqyn jeńisterdiń altyn bastaýynda Vladımır Sehanovıch pen Murat Esenjolov syndy bilikti bapkerlerdiń turǵanyn keıingi jastar bilmeýi de múmkin.
Shalqarda klassıkalyq kúrestiń irgetasyn qalaǵan Vladımır Sehanovıchteı maıtalman mamannan tálim-tárbıe alǵan Murat Álimbaıuly birqatar iri dodada daralanyp, 1972 jyly KSRO sport sheberi atandy. Sodan keıin bapkerliktiń qamytyn kıip, jergilikti jastarǵa balýandyq ónerdiń qyr-syryn úıretti. Solardyń arasynan túrli jarystarda atoı salǵan Aǵzam Habıbýllın, Járdem Baıǵalıev jáne Murat Jumashev syndy sańlaqtardy bóle-jara ataýǵa bolady. Mákeń óziniń uly Aspandııardy da kúrestiń osy túrine baýlydy. Qazirgi kezde Aspandııar Muratuly respýblıkalyq kúres federasııasynyń baspasóz hatshysy qyzmetinde. Sonymen qatar jurt ony «Qazsport» arnasynyń kommentatory retinde de jaqsy biledi. Keıinnen Murat Esenjolov Shalqardaǵy balalar men jasóspirimderdiń sport mektebiniń dırektory bolyp taǵaıyndaldy. 1985 jyly Aqtóbedege «Lokomotıv» sport qoǵamynyń tóraǵasy boldy. Bir sózben aıtsaq, osydan jeti jyl buryn 70 jasqa qaraǵan shaǵynda dúnıeden ozǵan maıtalman maman búkil sanaly ǵumyryn oblys sportynyń órkendeýine arnady.
Osyndaı abzal azamattyń qurmetine tuńǵysh ret uıymdastyrylyp otyrǵan respýblıkalyq týrnırde Mańǵystaý oblysynyń órenderi tabysty óner kórsetti. Osy óńirden shyqqan Sultan Samatuly (25 kılo), Álı Almas (31 kılo) jáne Dáýlet Sabyrjan (34 kılo) syndy sportshylar jeńis tuǵyrynyń eń bıik satysyna kóterildi. Shalqardaǵy Vladımır Sehanovıch atyndaǵy sport mektebiniń eki birdeı túlegi bas júldeni oljalap, jergilikti jankúıerlerdi qýantty. Olar – Baýbek Shárip (28 kılo) pen Izbasar Tileýimbet (41 kılo). Ekeýi de fınalda ózderiniń komandalyq áriptesteri – Baısalbek Ahmetjan men Aıbar Jumabaıdy utty. Sondaı-aq aqtóbelik Qýanyshbek Jańajol (38 kılo), oraldyq Ámirhan Ábdirhamanov pen Mıarly Aronov, shymkettik Marlen Tólesh (44 kılo) jáne araldyq Mıras Mahanbet (48 kılo) osy týrnırdiń jeńimpazy atandy.
